Somaliland oo Cambaareysay Qodobbo ku jiray War-murtiyeedkii Shirkii IGAD (SAWIRRO)
Arbaco, September 14, 2016 (HOL) —
Madaxweynaha Somaliland Axmed Max'ed Max'ud Siilaanyo ayaa cambaareeyey qayb ka mid
ah War-murtiyeedkii ka soo baxay Shirkii IGAD ku qabsatay
Muqdisho, isla markaana xusay in Marti-qaad uu u fidinayaan Midowga
Afrika inay u soo diraan Somaliland Guddi Xaqiiqo-raadis ah si ay u eegaan Rabitaanka Shacabka
Somaliland iyo sharciyadda ay ku dhisan tahay ee waafaqsan Axdi-qarameedka Xuduudaha Qaaradda Afrika.
Sidaas wuxuu ka sheegay
shir casho sharaf ah oo xalay ka dhacday xarunta madaxtooyadda uu madaxweynuhu
la yeeshay guddida heer qaran ee Ictiraaf raadinta Somalialnd, waxaana Ujeeddada kulan lagu sheegay in ay tahay Dardar-galinta ka midho dhalnta ictiraaf
ay hesho Somaliland.
Madaxweyne Siilaanyo oo ka hadlayay shirkii Ururka IGAD uga Furmay Muqdisho, ayaa yiri. “Sida aynu la wada soconno, waxa caasimadda dalka Somalia lagu qabtay maanta shir sannadeedkii urur-goboleedka ay ku buhoobeen dalalka Bariga Afrika ee
IGAD. Marka ugu horreysa, waanu soo dhawaynaynaa in Shirkaasi ka dhaco magaalada
Muqdisho, waxaanu u aragnaa Tallaabo Geesinimo leh oo hore loo Qaaday. Somaliland, waxay soo Dhawaynaysaa Dadaallada ay ugu jirto beesha caalamka iyo
dalalka Midowga Africa sidii nabad loogu soo dabbaali lahaa Dalka Somalia, isla
markaana loogu dhisi lahaa Dawlad adag oo hanata xilka iyo masuuliyadda
saaran.Waxaanu diyaar u nahay in aanu ka qayb qaadanno, isla markaana gacan
weyn ka geysanno dedaaladda nabadda iyo dib u heshiisiinta dadka aanu walaalaha
nahay ee Soomaaliyeed. Waxaanu nahay dal iyo dad bisil oo aaminsan in dhibaatada
gaadha ay annagana saamayn nagu leedahay. Sidaa darteed, waxaanu jecel-nahay
nabaddooda iyo horumarkooda.”
Madaxweynuhu wuxuu
cambaareeyey qodobo ku jiray war-murtiyeedka ka soobaxay shirkii IGAD ee
Muqdisho ka dhacay, waxaanu yidhi “Waxaanu cambaaraynayna war-murtiyeedka ka
soo baxay Shirka Madaxda IGAD ee ka dhacay Magaalada Muqdisho, gaar ahaan
Qodobka ka hadlaya Midnimada Somalia. Waxaanu u aragnaa mid la majara
habaabiyay, oo aan ka turjumayn xaqiiqada dhabta ah ee xaaladda Somalia iyo
Somaliland ka jirta. Waxaanu dunida u caddaynaynaa in Somaliland tahay dal
madax bannaan oo aan ka mid ahayn maamul goboleedyada ku midoobay Nidaamka
Federaalka Dawladda Somalia, ee looga taliyo magaalada Muqdisho.Waxaanu u
caddaynaynaa Beesha Caalamka in aanay metelin Somaliland shaqsiyaad Muqdisho
laga cugtay. Waxaanu u aragnaa maag iyo meel ka dhac qaawan, in magaca qarankayaga
loo cimaamado cid aan shacbiweynaha Somaliland dooran, ama aanay ceelalyo u
diran. Ummadda Somaliland waxaa matala oo kaliya, kana mas'uul ah, madax ku
timi doorasho xor iyo xalaal ah (Xukuumad iyo Baarlamaan).”
Isagoo intaa ku daray. “Somaliland, waxaan Beesha Caalamka ugu baaqayaa inay garwaaq-sadaan xaqa
sharci iyo ka bini'aadannimo ee Shacbiga Somaliland u leeyihiin inay noqdaan
qaran madax-bannaan.”
“Qarannimada iyo
Madaxbanaanida Somaliland waxay dan u tahay amniga, deganaanshaha, Geeddi-socodka Dimuqraadiyada, Ganacsiga iyo horumarka Bariga Africa iyo ka caalamka intaba.
Madaxda Urur Goboleedka IGAD iyo Waddamada Midowga Afrika intooda kaleba, Waxaana
ka codsanayaa inay qadiyadda Somaliland miiska keenaan, isla markaana
shirarka dambe ajandayaashooda ku daraan. Waxaan ku Marti-qaadayaa Dalalka Midowga
Afrika in ay u soo diraan Somaliland guddi xaqiiqo raadis ah oo ka gun gaadha
raabitaanka Shacbiga Somaliland iyo sharciyada ay ku dhisan tahay waddan ahaan,
siday u waafaqsantahay Axdi Qarameedka Xuduudaha Qaaradda Afrika,”
Ugu dambeyn, Shirka waxa
hadallo ka soo jeediyey Wasiirka Arrimaha Dibeda Somaliland, Dr. Sacad Cali
Shire, Adna Aadan Ismaaciil, Guddoomiye ku xigeenka Koowaad ee Golaha
Wakiillada Baashe Maxamed Faarax, Guddoomiyaha Xisbiga Mucaaridka ah ee
UCID, Inj. Faysal Cali Waraabe iyo Guddoomiye ku xigeenka Labaad ee Golaha Wakiillada |SL, Siciid Jaamac Cali,
Barkhad-ladiif M. Cumar,
Hiiraan Online
[email protected]
Hargeysa, Somaliland