Garoonka Diyaaradaha Muqdisho oo laga joojiyay maanta Duullimaadyadii Rayidka ahaa ee imaan jiray
Talaado, September
13, 2016 (HOL) — Duulimaayadii rayidka ahaa ayaa laga joojiyay inay maanta yimaadaan garoonka diyaaradaha Muqdisho, iyadoo lagu wado inay garoonka Aden Adde kasoo dagaan madaxda Waddamada ku bahoobay IGAD oo shirkoodii uug horreeyay maanta ku
yeelanaya Muqdisho.
Qaar ka mid ah saraakiisha
garoonka diyaaradaha Muqdisho ayaa Warbaahinta u xaqiijiyay inaysan maanta
jirin wax duullimaadyo ah oo dad keenaya ama ka qaadi doona garoonka
diyaaradaha Muqdisho.
Sidoo kale, shaqaalaha
garoonka diyaaradaha Muqdisho ayaa lagu warjiyay inaysan shaqo u imaan garoonka
maalinta talaalada oo maanta ah; waxaana garoonka lagu soo warramayaa inay
diyaar ku yihiin madaxda Dowladda Somalia oo soo dhaweyn u sameyn doona madaxda
IGAD ee iman doona maanta.
Waddada gasha garoonka
diyaaradaha Muqdisho ayaa la suray Calammada dalalka IGAD, taasoo qayb ka ah
soo dhaweynta madaxda Waddada IGAD ku bahoobay oo maanta soo gaaraya Muqdisho.
Dhanka kale, Illaa hadda
lama caddeyn madaxda IGAD ee imaanaysa Muqdisho, inkastoo madaxweynaha waddanka Sudan,
Cumar Xasan Bashiir uu horay u sheegay inuusan kasoo Qayb-galayn Shir-madaxeedka IGAD
ee Magaalada Muqdisho lagu Qabanayo, Sababo la xiriira ammaankiisa, maadaama ay
baadi-goob ku hayso maxkamadda ICC oo eedo kala duwan u haysata.
Ugu dambeyn, Ammaanka Muqdisho,
gaar ahaan agagaarka garoonka diyaaradaha ayaa aad loo adkeeyay,
iyadoo loo diiday in ay Shacabka iyo gadiidku maraan, waxaana sidoo kale la
xiray goobaha ku dhaw garoonka diyaaradaha ee Muqdisho.
Maxamed X. Xuseen, Hiiraan Online
[email protected]
Muqdisho, Soomaaliya
