Xisbiyada Somaliland oo ku kala Aragti Duwanaaday Go’aankii Madaxweynaha ee Doorashooyinka
Axad, September 11, 2016 (HOL) —
Xisbiyada mucaaradka, ayaa siyaabo kala duwan uga hadlay go’aankii
madaxweynaha ka soo baxay ee lagu kala qaaday labaddii doorasho ee is
barkanayd.
Guddoomiyaha xisbiga UCID
Faysal Cali Waraabe ayaa si taxadar ku jiro usoo dhoweeyey go’aanka
madaxweynaha, isla markaana shuruud ku xidhay muddo kordhin loo sameeyey golaha
Wakiiladda, waxaanu soojeediyey in gudoomiyaha golaha Wakiiladda meesha ka baxa
oo uu u hadho xisbigiisa WADANI.
Sidoo kale, xisbiga
mucaaradka ah ee WADANI ayaa ka soo horjeestay muddo kordhinta loo sameeyey
golaha Wakiilada iyo kala qaadista doorashooyinka qorshuhu ahaa inay mar wada
dhacaan.
Xoghayaha Guud ee Xisbiga Waddani, Maxamed Cabdullaahi Uur-cadde, ayaa sheegay in xukuumadda kulmiye aanay doonayn inay doorasho qabato,
isla markaana sharci daro tahay in ka kala saaro labadda doorasho ee lagu
heshiiyey inay mar wada dhacaan.
Ugu horeyn xoghayaha guud ee
xisbiga WADANI Uurcade oo ka falcelinaya go’aankii madaxweynuhu soo jeediyey ee
uu ku kala qaaday doorashadda, waxa uu yidhi
“Midi waa nasiib daro qarankan waxa muuqata in xukuumada KUlmiye aanay
doonayn inay dalka doorashooyin ka dhacaan, in ay doorasho qabata aanay diyaar
u ahayn, maalin walba mushkilad aan jirin ay abuurayso, haddii aanu nahay
xisbiyada qaranka waxaan u gudbinay tabasho laga qabay saami qaybsiga kuraasta
baarlamaanka, madaxweynaha waxaanu ku nidhi waxaanu taageerayno wax alaale waxa
tabashadaasi saami qaybsiga kuraasta aad go’aanka gaadho, meel uu isagu rabay
oo ahaa in ay mudadda korodhsadaan oo ahaa in golaha Wakiiladda mudadda loo
kordhiyo ayey mareen, Somaliland waxay ku iibsamaysa waa doorashooyin”.
Xoghayaha guud ee Xisbiga
WADANI, waxa uu intaas ku daray “Rayaale intii uu joogay wuxu qabtay laba doorasho oo madaxtooyo,
doorashada golaha Wakiiladda, golihii deegaanka, afarta doorasho ayuuu is
raaciyey mudadii uu joogay, sharciiga uu goluhu ku fadhiyo waxa sameeyey
Rayaale, haddii aad tidhaahdid tii horana raaci maayo mid cusubna samayn maayo,
marka xal maaha muddo la kordhiyaa, sharciga haddii la raacayo in la sameeyo in
tiro koob lagu sameeyo, waxaan qabnaa in golaha guurtidda oo kale laga dhigay
golihii wakiiladda, marka waxaanu u aragnaa in aanay xukuumadda kulmiye
doorasho rabin, madaxweynuhu yaanu guddi ku marmarsoon ee go’aan ha ka gaadho
saami qaybsiga oo uu sida uu arko wada jirka iyo danta Somaliland ku dhameeyo”
Dhinaca kale, Guddoomiyaha
xisbiga mucaaradka ah ee UCID Faysal Cali Waraabe, ayaa isagu ka duwanaa ka soo
horjeesta xisbiga WADANI, waxaanu si taxadar ku jiro u taageeray go’aanka
madaxweynaha, waxaanu yidhi “arrinta
madaxweynaha laga doonayey may ahayn muddo kordhin ee waxay ahayd saami
qaybsiga kuraasta baarlamaanka, madaxweynuhu haddii uu xalin kari waayey anagoo
ku taageersanay wax kasta uu go’aamiyaa inaanu ku taageerayno, mar haddii ay la
noqotay inuu kala saaro waa arrinkii aanu ku heshiinay inuu wax kasta oo uu
go’aamiyo ku raacnaa, anagu waanu taageersanay go’aankaasi,laakiin shuruudo
ayaanu ku xidhaynaa, shuruuduhu waxa weeyi in qorshe la sameeyaa oo dib loo
qiimeeyaa golaha Wakiiladdu wuxuu qaban lahaa mudaddaasi la kordhiyey, marka ha
noqdo golahaasi mid nidaam ku shaqaynaya, qodobka labaad arrinkan saami
qaybsiga kuraasta waa in xalkeedii la keenaa, marka anagu si taxadar leh baanu
u soo dhoweynayaa, marka waa in madaxweynuhu na tusaa in wakhtiga la kordhiyey
wakhti macquul ah tahay, waa in dib loo qiimeeyaa oo caalamka ma jirto
gudoomiye mucaarad meel uu gudoomiye golaha Wakiiladda ka yahay ma jirto, waa
in gudoomiyaha, ahna musharaxa xisbiga Wadani meesha ka baxo, marka haddii uu
dastuurka la jabiyey ku sii jiro wax la aqbali karo maaha, qodobkan saami
qaybsiga waa in laga sameeya qorshe ah goorta la xalinayo ilayn waligii ina hor
taagnaan maayee, waa in xal loo helaa, ta kale beesha caalamku arrintan way
diidaysa waxa laga yaabaa in aanay dhaqaalaha bixin ee waa in marka loo diyaar
garoobaa”
Dhanka kale, labadda xisbi
ee mucaaradka ah ayaa ku kala aragti duwanaanaday go’aanka madaxweynuhu soo
saaray, halka xisbiga taladda haya ee kulmiye uu isagu taageeray go’aanka
madaxweynaha ka soo baxay.
Hase yeeshee, beesha
caalamka ee dhaqaalaha ku bixiya doorashooyinka Somaliland ayaa madaxweynaha
iyo xukuumadda ku cadaadisay in doorashaddu wakhtigeeddii dhacdo, isla markaana
sidii lagu heshiiyey in labadda doorasho wada dhacdaan, iyagoo madaxweynaha
kula taliyey in caqabadaha hor yaala sababta aanay doorashaddu mar wada dhaceen
la xaliyo ka dib wakhtigii lagu heshiiyey mar wada dhacaan, balse arrintaasi
waxa wax ka bedelay go’aaanka madaxweynuhu ku kala saaray.
Barkhad-ladiif M. Cumar,
Hiiraan Online
[email protected]
Hargeysa, Somaliland