Madaxweyne Xassan Sheekh oo bogaadiyay doorashada xildhibaannada gobollada W/qooyi
Arbaco, December, 07, 2016 (HOL) - Madaxweynaha DF Soomaaliya Xassan Sheekh Max'uud ayaa bogaadiyay doorashada xildhibaannada ka soo jeeda gobollada W/qooyi [Soomaaliland] oo maalintii shalay ka bilaabatay magaalada Muqdisho.
“ Doorashooyinka Golaha Shacabka ee ka billowday ee
Muqdisho, waxay sii adkeneysaa sida dhammaan ummadda Soomaaliyeed uga
go’an tahay inay ka gudbaan marxaladaan Tariikhiga ah ee ay ku
dhismeeyso Soomaaliyada cusub, oo si wada-jir ah ugu diyaarsan
horu-socod iyo u bislaashiyaha dowladnimada iyo raadinta midnimada
Qarannimada Soomaaliyeed” ayuu yiri Madaxweynaha.
Madaxweynaha Soomaaliya , wuxuu u mahadcelinayaa Guddiga
Doorashooyinka ee heer Federaal iyo heer Dowlad Gobolleed oo in muddo
ah waday qorshaha Hannaanka Doorashooyinka 2016 oo ku guuleystay in
doorashooyinka Golaha Shacabka in ay qabsoomaan in ka badan intooda
badan.
Madaxweynaha, ayaa ugu baaqay Madaxda Dhaqanka Beelaha
Gobollada Woqooyi , Guddiyada Doorahsooyinka Dadban ee Heer Federaal iyo
Kan Gobollada Woqooyi inay xaqiijiyaan doorka kootada haweenka ee lagu
heshiiyey oo ah Sodon Boqolkiiba (30%).
Madaxweynaha ayaa ka digaya fara-gelin lagu sameeyo
guddiyada badaxa banaan ee Doorashooyinka Dadban, wuxuuna ku baaqayaa
inla ilaaliyo habraaca doorashooyinka ee horrey loogu heshiiyey lagana
fogaado wax walba oo wax u dhimayo habsami u socodka doorashooyinka.
Ugu dambeyntii, Madaxweynaha ayaa ku ammaanaya Shacabka,
ciidamada ammaanka Qaranka Soomaaliyeed, kuwa AMISOM, Dowlad
Gobolleedyada iyo beesha caalamka dulqaadkooda iyo ka qeyb qaadashadooda
ku aadan in la soo gaaro maanta, in heer gaba-gaba ah ay marayaan
Doorashooyinka Dadban ee ka dhacay 6 magaalo oo dalka Soomaaliya ka mid
ah.
C/raxmaan Diini, Hiiraan Online
[email protected]
Beledweyne. Soomaaliya
