Jimco, November 14, 2025 (HOL) - Isbitaalka Aga Khan University Hospital (AKUH) iyo shirkadda diyaaradaha ee Kenya Airways (KQ), oo ay ku jirto qaybteeda daryeelka caafimaadka ee KQ Health, ayaa kala saxiixday heshiis iskaashi oo lagu horumarinayo safarka caafimaadka ee bukaannada ku nool guud ahaan qaaradda Afrika.
newsinsideIskaashigan ayaa dhisaya nidaam isku dhafan oo loogu talagalay bukaannada raadineysa daaweyn gudaha dalka Kenya, iyadoo ujeeddadu tahay in Kenya laga dhigo xarunta hoggaamisa daryeelka caafimaad ee tayo sare leh ee Afrika.
Sida ku cad heshiiska, KQ Health waxay bukaannada siin doontaa adeegyo taageero oo dhammeystiran, oo ay ku jiraan oggolaanshaha caafimaadka ka hor safarka, adeegyada daryeelka caafimaad ee diyaaradda (end-to-end logistical support), iyo ambalaas toos uga qaadaya garoonka diyaaradaha kuna wareejinaya Isbitaalka Jaamacadda Aga Khan. AKUH ayaa markaasi la wareegi doona bukaannada, iyagoo u fidinaya adeegyo caafimaad oo takhasusyo badan leh, sida kansarka, wadnaha, qalliinka, iyo daryeelka xaaladaha halista ah.
“Iskaashigan wuxuu u fududeynayaa bukaannada Afrika oo dhan inay helaan daryeel caafimaad oo heer caalami ah iyagoo aan ka bixin qaaradda,” ayuu yiri Rashid Khalani, Agaasimaha Guud ee Isbitaalka Aga Khan University Hospital.
“Marka bukaanku ku helo daryeel meel u dhow gurigiisa, wax badan ayey u taraysaa isaga iyo qoyskiisa—waxay helayaan safar ku habboon, deegaan iyo dhaqan ay yaqaannaan, iyo dareen sharaf leh oo lamid ah daryeelka caafimaad oo gudaha dalkooda laga heli karo.”
Agaasimaha Fulinta ee Kenya Airways, Allan Kilavuka, ayaa isna yiri: “Tani waa tusaale muujinaya sida duulimaadyadu ay si toos ah u taageeri karaan helitaanka adeegyada caafimaadka. Anagoo iskaashanayna Aga Khan University Hospital, waxaan dadka u soo dhoweynaynaa ma ahan oo keliya meelaha loo safro, balse sidoo kale adeegyo muhiim ah oo nolosha beddeli kara.”
Safarrada caafimaadku waxay noqdeen adeeg sii kordhaya oo ay u baahan yihiin dadka Afrika, iyadoo bukaanno badan weli ugu safraan dibadda daryeel caafimaad oo tayo leh. Isku-darka adeegyada gaadiidka iyo daaweynta ayaa ujeedkiisu yahay in la bixiyo adeeg ammaan ah, la awoodi karo, qiimo leh, isla markaana u dhow bukaannada.
Iskaashiga AKUH iyo Kenya Airways wuxuu sidoo kale kaalin ka qaadanayaa ajandaha Hiigsiga 2030 ee Kenya, oo xooga saaraya dhismaha waddan noqda xarunta gobolka ee hal-abuurka iyo daryeelka caafimaadka heerka sare.
Muddo ka badan 65 sano, Isbitaalka Jaamacadda Aga Khan ee Nairobi wuxuu dejinayay heerarka daryeelka caafimaadka oo dhammeystiran iyo waxbarashada caafimaadka casriga ah ee Bariga Afrika. Isbitaalka oo caan ku ah shaqaale karti leh, xarumo casri ah, iyo adeegyo caafimaad oo horumarsan, ayaa maanta ka mid ah xarumaha caafimaad ee ugu sumcadda iyo hogaanka badan gobolka.