Sabti, Maarso, 18, 2023 (HOL) - Somaliland ayaa sheegtay in kooxo ay ku tilmaantay huwan, oo ay sheegtay in argagixiso kamid tahay isla markaana ay Puntland hogaaminayso ay weerar muddo la qorshaynayay kusoo qaadeen fadhiisimada millatariga ee aaga Laascaanood.
Qoraal lagu baahiyay boga Wasaarada Gaashaandhiga Somaliland, ayaa lagu sheegay in saaka subaxdii hore ay xoogaga ka dagaalamaya Laascaanood weerar ku qaadeen fadhiisimada ciidamada.
"Kooxaha huwanta ah ee isugu jira Ciidanka Maamulka Puntland-Somaliya, Argagixisada iyo kuwa nabadiidka ah ee ku sugan Laascaanood ayaa saaka 4:30 subaxnimo weerar ku soo qaaday fadhiisimada ciidamada Qaranka, Jamhuuriyadda Somaliland ee dhinaca bariga magaalada Laascaanood".
Qoraalka waxa lagu sheegay in ciidanka millaterigu uu iska difaacay weerarka, isla markaana aanu ciidanku marnaba weerar ahayn, oo uu ilaalinayo xabad joojintii ay xukuumada Somaliland ku dhawaaqday.
Waxa kale, oo qoraalka lagu sheegay in masuuliyada weerarkan ay qaadayso Puntland, isla markaana uu ahaa weerar mudo dheer la qorshaynayay iyagoo xoogagu ay helayeen gurmadyo kala duwan.
Muddo 10 cisho ka badan ma dhicin iska hor imaad toos ah, waxaana socday dadaalo la doonayo in dhinacyada laysku soo hor fadhiisiyo, wadahadalkaas oo ay garaadadu shuruud uga dhigeen in ciidanka Somaliland uu gobolka ka baxo.
Abdilahi Geel-maal, Hiiraan Online
[email protected]