12/2/2022
Today from Hiiraan Online:  _
Wararka Maanta- Khamiis, Sept 29, 2022
Madaxda ugu sareysa dalka iyo masuuliyiin kale oo ka tacsiyeeyay geerida Nabadoon Cilmi Hagar Guure
 

Khamiis, September, 29, 2022 (HOL) - Madaxweynaha dowladda Federaalka Soomaaliya Xasan Sheekh Maxamuud ayaa uga tacsiyeeyay shacabka Soomaaliyeed, gaar ahaan shacabka reer Hiiraan geeridii ku timid Nabaddoon Cilmi Hagar Guure oo uu sheegay inuu ka mid yahay halgameyaasha Soomaaliyeed ee u shahiiday difaaca dalkooda iyo dadkooda.

Madaxweyne Xasan ayaa xusay sida uu uga dhabeeyey Nabaddoon Cilmi Hagar halgankiisa iyo oraahdiisii ahayd in uu dalka ka xoreeynayo Al-shabaab ama uu shahiidayo, isagoo dagaal kula jira Al-shabaab, taasina ay muujinayso in waxgaradka, ciidamada Qalabka Sida iyo guud ahaan shacabka Soomaaliyeed inay ka go’an tahay xoreynta dalka.

“Nabaddoon Cilmi Hagar waxa uu lahaa labo himilo oo aad u weyn, labadiiba waa ku guuleystay. In uu deegaankiisa ka xoreeyo argagixisada iyo in uu u shahiido isagoo dalkiisa ka difaacaya argagixisadan khawaarijta ah. Waxa uu tusaale u yahay sida halgankani uu uga dhab yahay shacabka iyo dowladda Soomaaliyeed" ayuu yiri Madaxeynaha Soomaaliya Xasan Sheekh Maxamuud.

Wuxuu intaasii ku daray madaxweynaha Soomaaliya in wali dalka gudahiisa ay ku nool yihiin kumanaan kale oo la mid ah Allah u naxariiste Marxuum Cilmi Hagar, kuwaas oo haatan diyaar u ah la dagaalanka Al-shabaab iyo sidii dalka looga xoreyn lahaa, waxaana madaxweynaha uu Alle u waydiiyey naxariistiisa Janno Nabaddoon Cilmi Hagar Guure.

Raysal wasaaraha Soomaaliya Xamse Cabdi Barre ayaa dhankiisa ka tacsiyadeeyay geerida Allah u naxariiste Nabadoon Cilmi Hagar oo Maanta ku dhintay dagaal ka dhacay Ceel qooxle, isagoo sheegay in Marxuumka uu astaan iyo halbeeg u yahay dadka u istaagay jihaadka ka dhanka ah Al-shabaab ee dalka looga xoreynayo.

" Waan ka tacsiyeynaya Geeridda xaqa ah ee Nabadoon Cilmi Xagar Guure oo maanta ku shahiiday dagaal xaq u dirir ah oo ka dhacay jiidda hore ee deegaanka Ceel Qooxle ee gobolka Hiiraan, Mujaahid Cilmi wuxuu ka mid ahaa odayaashii ugu horreeyay ee diiday gumeysiga iyo dhibaatada ay dadka Soomaaliyeed ku hayso argagixisadu, wuxuuna astaan iyo halbeeg u yahay jihaadka iyo dabargoynta ka dhanka ah kuwa dadkeenna nabadda iyo xasilloonida u diiday, waxaan Allaah uga baryay Mujaahid Cilmi inuu ka waraabiyo Jannadiisa midda ugu sareysa samir iyo iimaanna uu ka siiyo qoyskiisa iyo shacabka Soomaaliyeed" ayuu yiri Raysal wasaare Xamse

Waxaa sidoo kale ka tacsiyadeeyay geerida Nabadoonka masuuliyiin ay ka mid yihiin guddoomiyaha Golaha shacabka Sheekh Aadan Madoobe iyo madaxweynaha Hirshabeelle Cali Guudlaawe, siyaasiyiin kale iyo dad weyne farabadan, kuwaas oo dhamaantood Eebe uga baryay Marxuumka inuu ka waraabiyo Jannadiisa.












Click here
9/29/2022 1:14 PM EST
Khamiis, September, 29, 2022 (HOL) - Wasiiru dowlaha wasaaradda arrimaha dibadda Soomaaliya Cali Maxamed Cumar ayaa sheegay inay caqabad ku tahay soo celinta kumannaanka askari ee ku maqnaa dalka Eritrea tan iyo markii ay soo dhameysteen tababar ciidan.

9/29/2022 10:29 AM EST
Khamiis, September, 29, 2022 (HOL) - Taliyaha ciidanka dhulka ee xoogga dalka Soomaaliyeed Jenaraal Maxamed Tahliil Biixi ayaa faahfaahin ka bixiyay khasaaraha dagaal culus oo Maanta ka dhacay deegaanka Ceel qooxle ee gobolka Hiiraan, kaasoo dhexmaray ciidanka dowladda iyo kuwa dadka deegaanka oo dhinac ah iyo Ururka Al-shabaab.

9/29/2022 6:21 AM EST
Khamiis, September, 29, 2022 (HOL) - Xukuumada Somaliland ayaa ku dhawaaqday in raad shidaal laga helay deegaanka Baha Dhamal oo u dhow caasimada Hargaysa.

9/29/2022 6:03 AM EST
Khamiis, September, 29, 2022 (HOL) - Wasiirkii hore ee maaliyadda maamulka Puntland, Xasan Shire Abgaal ayaa sheegay inay Puntland u baahan tahay in laga badbaadiyo halka uu ku wado madaxweyne Deni.

9/29/2022 5:17 AM EST
Khamiis, September, 29, 2022 (HOL) - Wararka naga soo gaaraya deegaanka Ceel qooxle ee gobolka Hiiraan ayaa sheegaya in dagaal xoogan oo Maanta ka dhacay halkaasi in dadka ku dhintay uu ka mid noqday Allah u naxariistee Nabadoon Cilmi Hagar Guure oo ka mid ahaa Nabadoonada sida weyn caanka uga ahaa gobolka Hiiraan.

9/29/2022 3:39 AM EST
Khamiis, September, 29, 2022 (HOL) - Wararka ka imaanaya deegaanka Ceel qooxle oo qiyaastii 40 KM dhinaca bari kaga beegan degmada Moqokori ee gobolka Hiiraan ayaa sheegaya in halkaasi uu ka socdo dagaal culus oo u dhaxeeya ciidamada dowladda iyo ciidanka dadka deegaanka oo dhinac ah iyo kuwa Al-shabaab.

9/29/2022 3:17 AM EST
Khamiis, September, 29, 2022 (HOL) - Wasiirka Gaadiidka iyo Duulista Hawada Xukuumadda Federaalka Soomaaliya , Xil.Fardowsa Cismaan Cigaal ayaa kulan doceed la yeelatay dhigeeda Dalka Qatar, Mudane Jassim Saif Ahmed Al-Sulaiti iyo Madaxweynaha Hay’adda Duulista Hawada Dalka Imaaraadka Carabta, Sh. Ahmed bin Saeed Al Maktoum.

9/29/2022 1:06 AM EST
Khamiis, September, 29, 2022 (HOL) - Puntland ayaa sheegtay inay gacanta ku dhigtay dagaalamayaal katirsan Al-Shabaab, kuwaas oo loo maleynayo inay kasoo carareen howlgallada ka socda gobolada Hiiraan iyo Galgaduud.