Isniin, September, 19, 2022 (HOL) - Wasiirka arrimaha gudaha iyo dib u heshiisiinta Xukuumadda Federaalka Soomaaliya Axmed Macalin Fiqi ayaa Maanta kulan wadatashi ah la yeeshay Odeyaasha dhaqanka ee maamulka Galmudug oo uu kala hadlay kaalintooda la xiriirta dib u heshiisiinta, xasilinta deegaanada laga xoreeyey Alshabaab iyo ka feejignaanta qorsheyaal ay ku doonayaan iney isaga hor keenaan beelaha Soomaaliyeed.
Wasiirka Fiqi ayaa sheegay in kooxda Al-shabaab ay dooneyso in dagaalada lagula jiro oo noqday kuwa xoogeystay iney marin habaabiyaan oo ay diyaarsadeen qorsheyaal ay qoorta isugu galinayaan beelaha oo ay ka dhigayaan in dagaalka beel ku duushay deegaanka beel kale.
"Waxaan ku bogaadinayaa beelaha kala duwan sida ay uga gadooodeen dulmiga Al-shabaab ku hayeen, waxaana ku baaqaya in kacdoonka ka dhanka ah Shabaab inuu gaaro meesha ugu dambeysa, Alshabaab waxay ku tilmaameen dadkii ay tuulooyinka ka gubeen kuwoo mooriyaan ah oo qudhaacu dhuruq ah, waana ognahay in xagjirnimada kooxdaasi darteed aaney odeyaasha ka qeyb geli karin horumarinta deegaanadooda sida ceel qodis, guryo dhisid, beero iyo wixii la mid ah" ayaa lagu yiri qoraalka kasoo baxay Wasaaradda arrimaha gudaha.
Qoraalka kasoo baxay xafiiska wasiir arrimaha gudaha ayaa sidoo kale lagu sheegay inuu jiro shirweyne ay isugu iman doonaan reer Hirshabelle iyo reer Galmudug, kaasoo lagu qaban doonno magaalooyinka Baledweyne ama Dhuusamareeb mid kood, waxaana odeyaasha uu wasiirka ka dalbaday in ay kaalintooda ka qaataan arrimaha socda.
Odeyaasha dhaqanka Galmudug oo kulanka ka hadlay ayaa dhankooda sheegay in ay diyaar u yihiin halganka ka dhanka dagaalamayaasha Al-shabaab, waxayna wasiirka hordhigen qorshahooda la xiriira arrinkan, iyagoona wacad ku maray in ay huri doonaan naf iyo maalba.
Gabagabadii waxaa qoraalka lagu sheegay in kulamada watashiga ah ee uu la leeyahay wasiirka arrimaha gudaha odeyaasha dhaqanka inuu ballaarin doono oo ay ku xigi doonaan odayaasha dhaqanka maamulada Hirshabelle, Koonfur galbeed iyo Jubbaland.
Sikastaba ha ahaate Shalay ayay aheyd markii Afhayeenka Al-shabaab Sheekh Cali dheere uu si qota dheer uga hadlay dagaalka dowladda ay iclaamisay iyo kacdoonka shacab ee uga furmay Al-shabaab qaar ka mid ah gobolada dalka, kaasoo digniin culus hawada u mariyay beelaha dagaalada kula jira Ururkooda oo uu ku tilmaamay kuwa garab u ah wuxuu ugu yeeray gaalada.