Talaado, January, 4, 2022 (HOL) - Shirka Golaha
wadatashiga qaranka ayaa maalintiisa labaad galay, kaasoo shalay si
rasmi ah uga furmay teendhada Afisyooni ee magaalada Muqdisho ee
Caasimadda Soomaaliya.
Shirkaan
ayaa madaxda Golaha wadatashiga qaran ayaa waxay diiradda ku saarayaan
howlaha doorashooyinka dalka iyo khilaafka ka taagan doorashooyinkii
Golaha Shacabka ee dhawaan ka bilaawday magaalooyinka Muqdisho,
Baydhabo, Dhuusamareeb iyo kismaayo.
Waxaa
sidoo kale qodobada inta badan maanta shirka lagu falanqeyn doono la
sheegaya iney ka mid tahay sidii hal doorashada loogu soo koobi lahaa
hal deegaan doorasho, taasoo madaxda maamulada qaar ay si weyn u
daneynayaan in doorashada laga dhigo mid ka dhacda hal deegaan, taasoo
uu horay uga biyo diiday madaxweynaha muddo xileedkiisa dhamaaday
Maxamed Cabdullaahi Farmaajo.
Shirkaan
maalintiisa labaad galay waxa ka qaybgalaya dhamaan Madaxweynayaasha
maamul goboleedyada shanta ah, duqa magaalada Muqdisho iyo Raysal
wasaaraha Soomaaliya, waxaana la filayaa in maanta qeyb ka noqdaan
shirka Wakiilada Beesha Caalamka, Midowga Musharixiinta iyo Xubno metelaya Ururada Bulshada Rayidka ah iyo Haweenka.
Shirkaan
Golaha wadatashiga qaran ayaa ah mid si gaar ah isha ugu wada hayaan
waxyaabaha kasoo bixi doono shacabka Soomaaliyeed iyo waliba
daneeyayaasha arrimaha Soomaaliya, maadama doorashooyinka dalka waqtigii
loogu talo galay in la dhameystiro lasoo dhaafay.
Jamaal Cali Cabdi, Hiiraan Online