1/28/2022
Today from Hiiraan Online:  _
Wararka Maanta- Khamiis, Jan 13, 2022
Raysal wasaare Rooble oo golihiisa wasiiradda ka mamnuucay in ay wax heshiis ah galaan uguna digay musuq maasuq

Khamiis, Janaayo, 13, 2022 (HOL) - Raysal wasaaraha Soomaaliya Maxamed Xuseen Rooble ayaa hay’addaha dowladda uga digay in ay ku tagrifal ku sameeyaan hantida dowladda oo ay gacanta ku hayaan.

Raysal wasaaraha oo ka hadlayay shirka golaha wasiiradda ee maanta ayaa golihiisa wasiiradda ka mamnuucay waqtiyada doorashada lagu jiro inay galaan heshiisyo aan loo baahnayn oo degdeg ah.

“Waa in aan iska jirnaa in aan si qaldan u isticmaalno hantida qaranka, oo aanan galin heshiisyo aan loo marin sharciga. Waa inaan aad u taxadarnaa kana feejignaanaa,” ayuu yiri raysal wasaare.

Raysal wasaaraha ayaa u sheegay golaha wasiiradda iyo dhammaan hay’addaha dowladda in aysan jirin cid sameyn karta xil ka qaadis ama magacaabis aan fasax looga haysan xafiiskiisa.

“Qalad wuu dhici kara, waana lagu degdegi karaa, yaanay dhicin xil ka qaadis iyo magacaabis. Sababta aan saas u leeyahay wax kale ma ahan,  xilli gabagabo ah ayaa lagu jiraa, ma ahan qof qof ciil u qabo ama qof qof beegsanaya inaysan dhicin,” ayuu yiri Rooble.

Raysal wasaare Rooobe ayaa dhinaca kale faray agaasimayaasha guud ee wasaaraddaha in ay u hoggaansamaan awaamiirta kasoo baxda wasiiraddooda, una  arkin xilligaan lagu jiro in ay ku tagri fali karaan wasiiraddooda.

Hadalka raysal wasaaraha ayaa kusoo aadaya xilli maalmahaan uu khilaaf ka taagan yahay heshiis qandaraas ah oo wasiirka ganacsigu la galay shirkad gaar ah, isagoo u saxiixay qandaraaska hubinta tayo dhowrka badeecadaha kasoo dega dekeda Muqdisho.

Wasiirka ganacsiga ayaa agaasimaha tayo dhowrka shaqada uga joojiyay kadib markii ka hor yimid heshiiskaas. sidoo kale hanti dhowrka guud ee dalka ayaa sharci darro ku tilmaamay heshiiskaas.



Abdiweli M. Sheikh, Hiiraan Online












Click here
1/13/2022 9:59 AM EST
Khamiis, January, 13, 2022 (HOL) - Guddoomiyaha Xisbiga UCID Faysal Cali Waraabe, ayaa Guddoomiyaha Maxkamada Sarre ee Somaliland Aadan Xaaji Cali, ku eedeeyay in dacwada xeerka furista ururrada siyaasada aanu daacad ka ahayn.

1/13/2022 8:24 AM EST
Khamiis, January, 13, 2022 (HOL) - Xukuumada Somaliland ayaa ku dhawaaqday in abaaro ay ku dhufteen dad tirradoodu dhantahay 810,000 oo ku kala nool 6 gobol oo Somaliland ah.

1/13/2022 7:06 AM EST
Khamiis, Janaayo, 13, 2022 (HOL) - War qoraal ah oo kasoo baxay dhanka dowladda Itoobiya ayaa lagu sheegay in TPLF ay caqabad ku tahay gargaarkii lagaarsiin lahaa dadka dhibaataysan, ee gaajada iyo dhibaatooyinka kale saameeyeen ee ku sugan gudaha gobolka Tigray.

1/13/2022 3:19 AM EST
Khamiis, Janaayo, 13, 2022 (HOL) - Guddiga doorashada heer federal ayaa been abuur ku tilmaamay warqad baraha internetka lagu faafiyay oo la sheegay in xilka looga qaaday guddoomiyihii guddiga doorashada Galmudug, halka mid cusubna loo doortay.

1/13/2022 3:09 AM EST
Khamiis, Janaayo, 13, 2022 (HOL) - Waxaa Maanta oo Khamiis ah dib u dhac uu ku yimid banaanbax lagu waday in magaalada Muqdisho uu ka dhaco, kaasoo looga soo horejeedo madaxweynaha mudo xileedkiisu dhamaaday Maxamed Cabdullaahi Farmaajo.

1/13/2022 12:58 AM EST
Khamiis, Janaayo, 13, 2022 (HOL) - Guddiga hirgelinta doorashada maamulka Koonfur Galbeed ayaa shaaciyay in dhawaan ay qaban doonaan doorashada shan kursi oo ka mid ah kuraasta Golaha Shacabka Baarlamaanka 11-aad ee dalka.

1/13/2022 12:49 AM EST
Khamiis, Janaayo, 13, 2022 (HOL) - Hantidhowrka guud ee Soomaaliya ayaa joojiyay qandaraas uu wasiirka ganacsiga Soomaaliya ku siiyay tayaynta hubinta badeecadaha dekeda Muqdisho, shirkad lagu magacaabo Maru port.

1/13/2022 12:41 AM EST
Khamiis, Janaayo, 13, 2022 (HOL) - Shirkadda duulimaadyada ee Freedom Airline ee uu fadhigeedu yahay magaalada Nairobi ayaa dayuuradii ugu qaad-weyneyd ku soo kordhisay dayaaradeeda. Dayuurddaan oo ah nooca AIRBUS 320 ayaa noqoneysay dayuuraddii labaad laga diiwaan-galiyo dalka Kenya.

1/13/2022 12:33 AM EST
Khamiis, Janaayo, 13, 2022 (HOL) - Guddiyadii isku xilsaaray dhameynta khilaafka madaxweyne Deni iyo agaasimihii hore ee PSF ayaa ku kala qeybsamay go'aan qaar Isimada Puntland kasoo saareen arrinta Bosaso ka jirta.