Cabdiraxmaan Cabdishakuur'' Sida aan Arrrinta Gedo uga hadleyno waa in tan Beledweynana looga wada-hadlaa
Jimco, Janaayo, 01, 2021 (HOL) Hoggaamiyaha Xisbiga Wadajir ahna musharax u taaggan xilka madaxweynaha Soomaaliya ayaa mar kale si adag uga hadlay xaalada magaalada Beledweyne oo sida uu sheegay waxa ka soconaya aan loo dul qaadan karin.
''Horeyna waan uga hadlay haddana waan ku celinaayaa waxa Hiiraan ka socdaa waa dulmi, 30 dhalinyarro ah oo meel wada joogta ayaan habeen dhaweyd la hadlay, waxaan ku iri xaqiina si nabad ah ku raadsada, safaaradaha caalamka qaarkood ayaa markii ay arintaa maqleen ila soo xiriiray waxey igu dhaheen dadka hoggaamiyayaasha bulshada ah qaarkood manala hadashiin kartaa, waan isku xiray oo waan -wada hadashiiyay'' ayuu yiri Cabdiraxmaan Cabdishakuur Warsame.
AMISOM ayuu ugu baaqay in aan dadka awoodooda loo adeegsan oo lagu caburin, isaga oo yiri'' Reer Hiiraan mid ayaan rabaa in aan u sheego, haddii aad aragtaan AMISOM socta amarka waxaa bixiyay madaxweyne Maxamed Cabdullaahi Farmaajo isaga oo kaliya ayaa mari kara, kan Hirshabeellana ma amri karo, kan Beledweyne joogana ma amri karo''.
Wuxuu sheegay in wax la aqbali karo aheyn in AMISOM awoodda Golaha Amniga oo ay dalka ku joogaan ku caburso dadka rayidka ah, isaga oo dhinaca kale fariin u dirray ciidamada xoogga dalka Soomaaliyeed'' Waxaan maqlay in ciidamada dowladda Federaal ah ahaayeen kuwii jidadka Beledweyne rasaasta kula ridayay dadka rayidka ah, waxaan leeyahay Askariga waxaas sameynaya ogow kuwa madaxda kuu ah marka uu waqtiga ka dhamaado wey kaa tagayaan, qofka danbigiisa loo maxkamadeynayo waa adiga'' ayuu hadalkiisa sii raaciyay.
Siyaasiyiinta Soomaaliyeed iyo musharixiinta ayuu ugu baaqay in arinta Beledweyne laga wadahadlo isaga oo yiri'' sida aan dhibaatada ka jirta Gedo tan ka jirta Beydhabo uga wada hadalno waa in aan xaalada Beledweynana uga wada hadalnaa waayo dadka Soomaaliyeed weynoo siman yihiin''
''Dowladda waxaan toos u leenahay magaalada Beledweyne dhibka halaga daayo, dadka yaan lagu caburinin awoodda dowladda''
Maalmihii ugu danbeeyayba magaalada Beledweyne waxaa jirta xiisad ka dhalatay dhalinyarro badan oo loo xirxiray aragtidooda iyo in ay ka soo horjeesteen dhismaha Labaad ee Dowlad Gobolleedka Hirshabeelle kuwaa oo ilaa iyo hadda xabsiga ku jira.
Cabdiraxmaan Diini, Hiiraan Online
[email protected]
