12/3/2020
Today from Hiiraan Online:  _
Wararka Maanta- Sabti, Nov 21, 2020
Wasiir Duraan Faarax: Dalkeenna wuxuu is beddel ku gaari kara dib u heshiisiin iyo midnimo




Sabti, November, 21 2020 (HOL) - Wasiirka Shaqada iyo Arrimaha Bulshada Xukuumadda Federaalka Soomaaliya, Mudane Duraan Axmed Faarax ayaa degmada Galdogob ee gobolka Mudug maanta kaga qeybgalay kulan soo dhaweyn ah oo ay soo qaban qaabiyeen odayaasha dhaqanka,wax-garadka iyo maamulka degmada Galdogob.

Kulankan oo qado ahaa ayaa lagu boggaadiyay dadaallada wasiirka ee ku aaddan nabadeynta ,dib u heshiisiin iyo horumarinta gobolka Mudug, iyadoo sidoo kale ay ka qeybgaleen xubno ka tirsan qeybaha bulshada oo isugu jiray, aqoonyahanno,dhallinyaro iyo haween.

“Duraan saddex bilood ka hor wuxuu gobolka Mudug joogay muddo dheer isagoo waqtigaa u bixinayay nabadeynta iyo dib u heshiisiinta bulshada gobolka, maanta oo uu wasiir soo noqday wuxuu inoo yimid isagoo sida barnaamijyo horumarineed oo bulshada nugul,beeralayda iyo dan’yarta taageeraya,waxaan qirayaa inuu yahay qof ay ka go’antahay is beddel ka dhaca gobolka, waxaan u sheegaya inay bulshada gobolka jecelyihiin oo ay garabkiisa joogsanayaan.” ayuu yiri Suldaan Maxamed Axmed Faarax.

Caaqil  Cali Ciise Cali, oo ka mid ah odayaasha dhaqanka ee kulanka ka hadlay ayaa dhankiisa  sheegay qodobbo dhowr ah oo uu ku ammaanay wasiirka inuu ka qabtay gobolka Mudug.

“Gobolkan iyo deegaankan wuxuu u baahanyahay qof sida Duraan Faarax oo kale ah kuma ammaaneyno balse isagoo oo aan xil heyn waxaan ogeyn sida uu dadaalka iyo mas’uuliyada isaga saarayay in laga gudbo marxaladihii kala duwanaa ee deegaankan ka dhacay, sida horumarinta waxbarashada,dhallinyarada iyo nabdeynta.” ayuu yiri Caaqil Cali Ciise.

Wasiir Duraan ayaa uga mahadceliyay odayaasha dhaqanka,waxgaradka, qeybaha bulshada ivo maamulka degmada Galdogob maamuska ay ku soo dhaweeyeen , wuxuuna caddeeyay inuu diyaar u yahay howlihii uu gobolka ka hayay ee nabadeynta iyo horumarinta ay ugu horreysay inuu labo jibbaari doono.

“Maanta waxaan mas’uuliyad u qaadday bulshada Soomaaliyeed iyo dadka gobolka, waxaan mar walba diirrada saarayay in guud ahaan dalka uu ka dhaco is beddel horumarineed oo wax u tara dalka iyo qeybaha bulshada, taas ayaan hadda xoojin oo aan doonaya inan labo jibbaaro, waxaan dadaalka u bixinayay waxaan fahansanahay sida ay dalka iyo dadkeenna muhiim ugu tahay midnimada iyo wadajirka.” ayuu yiri wasiir.

Wuxuu soo hadal qaatay barnaamijyo horumarineed ee deegaanka dhowaan ka fulaya, wuxuuna kula dardaarmay odayaasha dhaqanka iyo wax-garadka in la xoojiyo midnimada ,dib u heshiisiin iyo caddaaladda.

“Degmada Galdogob waxay dhowaan odayaasha dhaqanka iyo qeybaha bulshada heli doonaan dhisme u gaar ah , dhallinyarada iyaguna waxaan ugu bishaareynaya inuu meel wanaagsan noomarayo dadaalka dib loogu dhisayo dugsiga farsamada gacanta ee degmada, waxaa sidoo kale socda sidii bulshada deegaankan ay u heli lahaayeen garoon diyaaradeed oo baahidiisa ay ka jirto dhulkan.” ayuu raaciyay.

Wasiirka Shaqada iyo Arrimaha Soomaaliya iyo wafdiga uu hoggaaminayo ayaa toddobaadkan socdaal shaqo ku jooga deegaannada Puntland, wuxuuna kormeer ku tagey deegaanno miyi ah iyo tuullooyin ay ka socda labada mashruuc ee taageeraya qoysaska nugul iyo kuwa uu Ayaxu saameeyay.

 Iman Jama, Hiiraan online
[email protected]












Click here
11/21/2020 2:10 PM EST
Sabti, November, 21, 2020 (HOL) -Xafiiska Ra'iisal Wasaaraha dalka Itoobiya Abiy Ahmed ayaa sheegay in ciidamada dowladda gacanta ku dhigeen magaalada lagu magacaabo Adigrat haatanna ku sii siqayaan magaalada caasimada ah Mekella.

11/21/2020 1:29 PM EST
Sabti, November, 21 2020 (HOL) - Maamulka gobolka Hiiraan ayaa xabsiga dhigay 7 ruux oo ka mid ah shaqaalaha Shirkadda Korontada Dayax Power Supply xafiiskeeda Baledweyne.

11/21/2020 10:22 AM EST
Sabti, November, 21 2020 (HOL) - 12 Musharax oo u taagan xilka madaxtinimada Soomaaliya oo maanta Muqdisho ku yeeshay kulan ku saabsan sidii loo mideeyn lahaa mowqifka hoggaamiyeyaasha mucaaradka, ayaa waxay dalbadeen in la helo doorasho la isku aamino karo in ay dalka ka dhacdo.

11/21/2020 9:49 AM EST
Sabti, November, 21, 2020 (HOL) - Dab baaxad leh ayaa baabiiyey guud ahaan dooxada degmada Xuddun ee gobolka Sool shalay gelinkii danbe xalay taas oo illaa haatan baxaysa.

11/21/2020 7:44 AM EST
Sabti, November, 21 2020 (HOL) - Ku-simaha Madaxweynaha Puntland, Ahna Madaxweyne Ku-xigeenka, Axmed Cilmi Cismaan Karaash iyo Xeer-ilaaliyaha Guud ee Qaranka Dr Sulaymaan Maxamed Maxamuud ayaa dhagax dhigay xarunta hay'adda Garsoorka Puntland.

11/21/2020 6:19 AM EST
Sabti, November, 21, 2020 (HOL)- Labo iyo Toban musharax oo garabka mucaaradka ah ayaa goor dhaw waxaa uu shir uga furmay Hotelka Jazeera ee magaalada Muqdisho, kaasoo ay uga arrinsanayaan doorashada dalka ee sanadkan 2020-21.

11/21/2020 6:01 AM EST
Sabti, November, 21, 2020 (HOL) - Guddomiyaha Aqalka Sare Cabdi Xaashi Cabdilaahi ayaa dhankiisa soo magacaabay Siddeed xubnood oo ah guddiga doorashada xildhibaannada gobollada Waqooyi [ Soomaliland]

11/21/2020 1:58 AM EST
Sabti, November, 21 2020 (HOL) - Gudoomiyaha gobolka Mudug Abdiladiif Muuse Nuur, ayaa sheegay in ay dad u hayaan qarax lagu weeraray ciidamo katirsan Puntland oo Roondo ka sameynayay waqooyiga magaalada Gaalkacyo.

11/21/2020 12:11 AM EST
Sabti, November, 21, 2020 (HOL) -Qarramada Midoobey ayaa walaac xooggan ka muujineysa xaalada bani'aadannimo ee ka jirta gobolka ay dagaalladu ka socdeen ee Tigrayga, waxeyna dalbatay in si KMG loo joojiyo xabadda.

11/21/2020 12:09 AM EST
Sabti, November, 21, 2020 (HOL) - In ka badan 50 Ardey Soomaaliyeed ah ayaa lagu waramayaa in ay ku go'doonsan yihiin gobolka Ismaamulka Tigreyga gaar ahaan magaalada Mekelle halkaasoo ay ka socdaan dagaallo culus oo u dhaxeeya dowladda Itoobiya iyo jabhada TPLF.

11/21/2020 12:02 AM EST
Sabti, November, 21 2020 (HOL) - Ra'iisal Wasaarihii hore ee Soomaaliya Xassan Cali Kheyre oo hadda ah musharax u taaga xilka madaxweynaha doorashada dhawaan dalka ka dhaceysa ayaa raalingalin buuxda ka bixiyay weerarkii saddex sano ka hor 17 Dec 2017 lagu qaaday guriga Siyaasiga Cabdiraxmaan Cabdishakuur Warsame.