Sheekh Maxamed Idiris oo tababar uu ku qabanayey magaalada Hargeysa laga joojiyey
Axad, September, 22, 2019 (HOL )– Xukuumadda Somaliland ayaa wadaadka caanka ah ee Sheekh Maxamed Idiris ka joojisay tobobar lacag lagu galayey oo ku saabsanaa farxadda Lamaanaha oo uu ku qabanayey magaaladda Hargeysa.
Gudoomiyaha gobolka Maroodi jeex
Jaamac Xaaji Axmed ayaa sheegay in aanay muxaadiro uu masaajid ku qabanayo
aanay joojin ee ay joojiyeen tobobar lacag ah oo uu ku qabanayey magaaladda
Hargeysa, waxaana ay ku doodeen in aan dawladda lala soo socodsiin.
“Waxaanu joojinay wax tababar
loogu yeedhay oo lagu xayeysiinayey baraha bulshadda, tobabar aan dawladdu
ogeyn in laga furo magaalada ma haboonna, qofka tobabar doonaya inuu furo waa
in laamaha dawladda ay khuseyso soo maraa.”ayuu yidhi gudoomiye Jaamac Axmed.
Mar la waydiiyey in lagu haysto
fagaare uu kaga hadlayey arrimo midnimada Soomaaliya khuseeya in lagu qoonsaday
iyo in kale, waxa uu gudoomiyuhu ku jawaabay “sheekhu hadii uu siyaasad gallo
oo dawladaha aflagaadeeyo hadana siyaasadii uu ka soo horjeeday uu yimaado oo
uu yidhaahdo tobabaro ka furayaa, taas lafteeda lama yeelayo cid kasta oo
qaranimada Somaliland ka soo horjeeda ama wax ka sheegta ma aqballayno inay
halkan tobabaro ka furaan iyo inay kulamo ku qabtaan”.
Si kastaba ha ahaatee, Sheekh
Maxamed Idiris ayaa marar badan booqasho ku yimid Somaliland,isla markaana
qoraalo ka qorey amniga iyo horumarka ka jirta Somaliland oo uu ku amaanayo,
haseyeeshee intii uu shaaciyey tobabarka farxadda lamaanayasha oo uu ku
qabanayey magaalada Hargeysa oo toban dollar lagu galaey ayaa dad faro badan oo
ka soo horjeeda wadaadka soo bandhigeen goob fagaare ah oo uu kaga hadlayo
midnimada Soomaaliya, kuwaas oo wadaadka ku eedeeyey in aanu qaranimada
Somaliland aaminsanayn, taas ayaana loo malaynayaa inay sababtay in la joojiyo
tobabarkii uu waday..
Barkhad-ladiif M. Cumar, Hiiraan Online
[email protected]
Hargeysa, Somaliland.
