Heshiiska Raashiinka iyo Shidaalka ee Ciidamada Qalabka Sida oo la kala saxiixday
Sabti, September, 21, 2019 (HOL)- Munaasabad lagu
kala saxiixanayay hesiis ku aadan Qandaraasyada Raashiinka iyo Shidaalka ee
Ciidamada Qalabka Sida ee Soomaaliyeed ayaa maanta lagu qabtay magaalada
Muqdisho,taasi oo ay ka qeybgaleen Wasiirro ka tirsan Xukuumadda Federaalka
Soomaaliya iyo saraakiil kale.
Wasiirka Gaashaandhigga Soomaaliya Xassan Cali Maxamed iyo wasiirka Amniga
Maxamed Abuukar Islow Ducaale,ayaa shirkado qaabilsan Qandaraasyada la
saxiixday heshiiska Qandaraasyada Raashiinka iyo Shidaalka ee Ciidamada Qalabka
Sida, kaddib munaasabad ballaaran oo ka dhacday magaalada Muqdisho.
Waxaa munaasabadda heshiiskaasi lagu kala
saxiixanayay goob joog ka ahaa Wasiirka Maaliyadda Soomaaliya Cabdiraxmaan
Ducaale Beyle iyo wasiirka Warfaafinta Dhaqanka iyo Dalxiiska Mudane Maxamed
Cabdi Xayir Maareeye iyo mas’uuliyiin kale.
Wasiir Beyle ayaa heshiiskani ku tilmaamay mid horseedi kara kalsooni
dhexmarta bulshada iyo hay’adaha dowladda Federaalka Soomaaliya.
Heshiiskan ayaa waxaa uu soo maray Habraaca iibka
Qaran ee wasaaradda Maaliyadda Soomaaliya,iyadoo tartan ay u soo galeen qaar
kamid ah shirkadaha Qandaraaslayaasha ah.