Mareykanka oo Sacuudiga u diraya ciidamo difaaca xarumaha Shidaalka
Sabti, September, 21, 2019 (HOL)-Xoghayaha Difaaca Mareykanka Mark Esper ayaa ku dhawaaqay inuu qorsheynayo ciidamo loo diro Sacuudi Carabiya, kaddib weeraradii todobaadkii hore lagu qaaday xarumaha laga soo saaro shidaalka.
Mark Esper ayaa sheegay in ciidamada la geynayo Sacuudiga ay yihiin
kuwo wax iska caabbin ah, si ay u difaacaan goobaha shidaalka Sacuudiga.
Xoghayaha Gaashaandhigga Mareykanka ayaa sheegay in Sacuudiga iyo
Imaaraadka ay ka dalbadeen Ciidamo, si ay u xoojiyaan difaaca hawada ee
dhanka Gantaalaha, waxaana la geyn doonaan qalab milateri labada dal.
Dowladda
Sacuudiga ayaa ku eedeysay Iiraan inay ka dambeysay weerarka lagu
qaaday labo warshadood oo kuwa shidaalka ah, waxaana ay soo bandhigtay
caddeymo muujinaya weerarka.
Dhinaca kale Madaxweynaha Mareykanka
Donald Trump ayaa shalay ku dhawaaqay in cunaqabateyn heerkeedu sarreeyo
ku soo rogi doonaan dalka Iiraan.
Xuutiyiinta Yemen ee ay
taageerto Iiraan ayaa sheegtay Mas’uuliyadda weerarada lagu qaaday
xarumaha shidaalka Sacuudiga, kaasoo sababay khasaarooyin fara badan iyo
inuu hoos u dhacay 50% wax soo saarkii Shidaalka.