Wasiirka Dib-u-heshiisiinta Hirshabeelle oo la kulmay maamulka degmada Feer-Feer ee Ismaamulka Soomaalida
Arbaco, May, 15, (HOL) – Wafdi uu hoggaaminayo Wasiirka
Dib-u-heshiisiinta dowlad gobolleedka Hirshabeelle Eng Cabdikariin Cali Nuur ayaa
markii ugu horeysay socdaal nabadeed ku tagay degmada Feer-Feer ee Ismaamulka
Soomaalida dalka Itoobiya.
Wasiirka iyo xubnihii la socday
waxaa soo dhaweeyay guddoomiyaha degmada Feer-Feer Cabdirashiid Ibraahim Dhaqane oo ay kulamo
gaar ah wada qaateen wasiirka iyo wadigiisa.
Guddoomiyaha degmada Feer-Feer oo
kulamada kaddib warbaahinta la hadlay ayaa sheegay in ay ku faraxsan yihiin
dhankooda in markii ugu horeysay ay halkan [Feerfeer] ku kulmaan wafdi ka socda maamul
gobolleedka Hirshabeelle.
‘’Ujeedada socdaalka wafdigan iyo
wax-yaabihii aynu ka wada hadalnay waxaa ay ahaayeen nabad-galyadii aynu awalba
ka wada xiriiri jirnay dalkan aynu dariska nahay ee Soomaaliya, gaar ahaan dowlad
gobolleedka Hirshabeelle, Annaga iyo Wasiirka waxeynu ka wada hadalnay arrimo
dhowr ah oo nabad=galyada quseeya ayuu yiri’’ guddoomiyaha degmada Feer-Feer.
Wuxuu gaar ahaan guddoomiyuhu
sheegay in Wasiirka ay isla soo qaadeen sidii looga shaqeyn lahaa nabad-galyada
dadka labada dhinac ee had iyo jeer isku guur-guura oo inta badan laga yaabo in
ay ka abuuranto nabad-galyo darada.
Wasiirka Wasaarradda
Dib-u-heshiisiinta maamulka Hirshabeelle ayaa sheegay in dhamaaba waxyaabihii
ay ka wada hadleen maamulka degmada Feer –feer isku afgarteen.
‘’Waxaan runtii ku faraxsannahay
sida uu noo soo dhaweeyay guddoomiyaha degmada, waanan isku afgaranay dhamaanba
waxyaabihii aan ka wada hadalnay oo ay ugu horeyso deegaameynta dadka iyo sidii
nabad-galyada bulshada labada dhinac looga wada shaqeyn lahaa’’ ayuu yiri
Wasiirka Dib-u-heshiisiinta maamulka Hirshabeelle.
Safarkan Wasiirka iyo wafdigiisa
ayaa imanaya xili sanadihii ugu danbeeyayba colaado ka taagnaayeen deegaannada
xadka gobolka Hiiraan uu la wadaago dhulka Ismaamulka Soomaalida Itoobiya,
waana markii ugu horeysay oo maamulka labada dhinac ay ka wada hadlaan arintan.
C/raxmaan Diini, Hiiraan Online
[email protected]
