Madaxweyne Waare’’ Waxaan dhiiri-galineynaa dhismaha Galmudug cusub
Isniin,July, 15, 2019 (HOL)-Madaxweynaha dowlad gobolleedka Hirshabeelle Maxamed Cabdi Waare oo maanta galinkii hore gaaray degmada Dhuusa-Mareeb ayaa sheegay in socdaalkoodu yahay mid qeyb ka ah dhiiri-galinta dadaallada lagu dhisayo Galmudug cusub.
Madaxweyne Waare oo sheegay in labada maamul ee Galmudug iyo
Hirshabeelle yihiin kuwo aan kala maarmin, islamarkaana uu ka dhaxeeyo xiriir
ganacsi iyo mid Amni intaba
‘’Socdaalkeena waxaa uu la
xiriira marka hore in aan dhiiri-galinno qeybna ka noqono dhismaha Galmudug-ta
cusub, maxaa yeelay Hirshabeelle kama maaranto Galmudug deggan oo nabadoon min
Gaalkacyo ilaa Guri-ceel’’ ayuu yiri madaxweye Waare.
Dhinaca kale waxaa uu sheegay in
socdaalkan ay uga faa’ideysan doonaan sidii xal waara loogu heli lahaa
dagaallada soo noqnoqday ee ka dhaca xadka labada gobol Hiiraan iyo Galgaduud,
iyadoo la kaashanayo ayuu yiri mas’uuliyiinta,
odayaasha iyo waxgaradka labada dhinac.
Waare ayaa ka anbabaxay magaalada
Beledweyne oo ku dhawaad Bil uu ku sugnaa kaddib markii la xaliyay khilaafkii
ka dhashay xil ka qaadistii guddoomiyihii hore ee maamulka gobolka Hiiraan.
Madaxweyne Waare ayaa sidoo kale
la filayaa in uu Dhuusa-mareeb kula kulmo Ra’iisal wasaaraha xukuumadda
Soomaaliya Xassan Cali Kheyre oo maalmihii ugu danbeeyayba socdaal ku marayay
deegaannada dowlad gobolleedka Galmudug.
C/raxmaan Diini, Hiiraan Online
[email protected]
