Ciidamada Kenya oo xalay bur buriyay xarun isgaar-siineed gobolka Jubbada Hoose
Isniin, Janaayo, 21, 2019 (HOL)-Qaar ka mid ah mas’uuliyiinta
shirkadda Isgaarsiinta Hormuud oo la soo xiriira Hiiraan Online ayaa sheegay in
ciidamada Kenya xalay gubeen xaruntii shirkadda Isgaarsiinta Hormuud ee
deegaanka Dhuyac –Garoon oo ka tirsan degmada Salagle ee gobolka Jubbada Hoose.
Qof ka tirsan shaqaalaha
shirkadda oo waqtigaa ku sugnaa xarunta ayaa la sheegay in ay ciidamadu dibedda
uga saareen kaddibna halkaa ku bur buriyeen agabkii yeelay iyo Anteennadii
shirkadda intaba, ciidamada ayaa lagu eedeeyay in ay bur burinta xarunta u adeegsadeen
Miino ama walxaha qarxa.
Xarunta ayaa qeyb ka ah xarumihii
dhawaan hawadda ka baxay markii sidan oo kale loo gubay xaruntii Isgaarsiinta
ee deegaanka Calibuley.
Waxaa hawadda ka maqan oo aan shaqeyn sida lagu soo waramayo qeybo ka
mid ah deegaannada gobollada Jubbooyinka iyo Gedo oo xiriirka isgaarsiinta ka
qaadan jiray xarumaha la bur buriyay.
Lix maalmood ka hor ayeey aheyd
markii sidan oo kale ciidamada u bur buriyeen xaruntii Isgaarsiinta shirkadda
ee deegaanka Calibuley, waxaana hawadda ka maqan Isgaarsiinta qeybo ka mid ah
deegaanno hoos taga Ceelwaaq ilaa Dhoobley, waxaana marka laga soot ago isticmaalka
isgaarsiinta dadku u adeegsan jireen isku gudbinta lacagaha EVC Plus
Ilaa iyo hadda ma jiro wax war ah
o oka soo baxay dhinaca dowladda Soomaaliya oo la xiriira eedeymahan loo jeedinayo
ciidamada Kenya ee bur burinta xarumaha Isgaarsiinta.
C/raxmaan Diini, Hiiraan
Online
[email protected]
