Xabsiga Jeel Ogaadeen-niya oo gabi ahaan la xiray
Isniin, September, 24, 2018 (HOL)
- Waxaa si rasmi ah albaabada loogu
laabay xabsigii ugu weynaa gobolka Ismaamulka Soomaalida ee Jeel Ogaadeen-niya oo
muddo dheer ay ku xirnaayeen maxaabiis loo heystay arrimo siyaasadeed haba ugu
badnaadeen dadka iyagu taageera Ururrada mucaaradka Itoobiya sida ONLF.
waxaana mas’uuliyiintu sheegeen
in loo beddeli doono Miyuusiyam ama matxaf loo daawasho tago. Maxaabiistii ugu
dambaysay ayaa la sheegay in halkaasi laga sii daayey shalay.
Bashir Axmed Xaashi oo ah taliye ku xigeenka
ciidanka asluubta dawlad deegaanka Soomalida oo arrinta xiritaanka xabsiga ka
waramayay ayaa sheegay in tallabadan tahay mid mudan in la soo dhaweeyo.
Go’aankan lagu xiray Jeelka waxaa gaaray golaha
wasiirradda dowlad deegaanka, iyadoo ay siweyn u soo dhaweeyeen dadweynaha kala duwan ee ku
dhaqan gobolka Soomaalida.
Dadka qaar ayaa la sheegay in muddo ka badan 5
sanadood ay ku xirnaayeen godad ka sameysan gudaha xabsiga, qaarkoodna waxaa ay
kala kulmi jireen ciqaab adag iyo jirdil loogu geysto halkaa.
Tallaabadan ayaa timid kaddib isbadal dhinaca
maamulka ah oo ka curtay guud ahaanba dhulka Ismaamulka Soomaalida, waxaana meesha ka baxay xukuumaddii hore ee
uu hoggaamin jiray Cabdi Maxamuud Cumar oo hada maxbuus u ah dowladda Itoobiya.
C/raxmaan Diini, Hiiraan
Online
[email protected]
