Taliska Booliiska oo faah faahin ka bixiyay dad loo xiray dilka wiil yar oo shan sano jir ah
Sabti, September, 22, 2018 (HOL)- Taliska Booliiska Soomaaliyeed
ayaa sheegay in tiro dad ah oo la tuhusan yahay loo qab qabtay dilka wiil yar
oo shan sano jir ahaa, kaa oo meydkiisa laga helay magaalada Muqdisho.
Taliyaha
ciidanka Booliiska Bashiir Cabdi Maxamed ayaa sheegay in ilaa saddex ruux loo hayo tuhun la xiriira dilka wiil yar, laakiin waxaa uu taliyuhu beeniyay in
wiilka yar Kilyaha lagala baxay.
Wuxuu sheegay
in ciidamada oo howlgal ku jira arkeen meydka wiilkan yar oo
gaari looga dhaxtagay kaddib-na ay
ciidamadu dadkan ka soo qabteen xaafadda Juungal ee degmada Yaaqshiid oo ah
halka laga helay meydka wiilka yar.
Meydka
wiilkan shan sano jirka ah ee la helay ayaa qeyb ka noqonaya dhacdooyin dilal
ah oo is xig xigay, kuwaa oo waayadii ugu danbeeyay ka dhacayay magaalada
Muqdisho, dilalkan-na qaarkood waxaa ay ahaayeen kuwo bulshada ka fajiciyay,
sida haweeneydii shalay lagu dhax dilay gudaha fasalkeedii waxbarashada Jaamacada
Soomaaliya iyo qof loo dilay kadib-na dab la qabad-siiyay arrimo la xiriira
Heeyb Sooc Guur.
C/raxmaan Diini, Hiiraan
Online
[email protected]