Xukuumadda Somaliland oo gardaro ku tilmaamtay socdaalka Cabdiwali Gaas ku yimid Badhan
Arbaco, September, 19, 2018 (HOL) - Xukuumadda iyo
xisbiyada mucaaradka ayaa cambaareeyey socdaalka madaxweynahah Puntland ee
SOomaaliya ku yimid magaalada Badhan ee gobolka Sanaag, waxaanay ku tilmaameen
gardaro iyo in dagaal kale ka bilaabmo deegaankaasi.
Madaxweyne ku xigeenka Somaliland C/raxmaan
Saylici iyo labada gudoomiye ee xisbiyada UCID iyo WADANI ayaa si wada jir ah u
cambaareeyey safarkaasi uu Cabdiwali Gaas ku tagay bariga Sanaag.
“Socdaalka madaxweynaha maamulka Puntland
Cabdigali Gaas ku yimid Badhan waxaanu u aragnaa xadgudub qaran, iyadoo
caalamku la socdo sababta dhaliyey dagaalka Tuko raq inay ahayd wasiiro
fadaraalka Soomaaliya ah oo yimid Badhan, iyadoo tii hore aan la isla meel
dhigin ayey gardaro kale sameeyeen oo ay doonayaan in meel kale ka furaan
dagaal kale, anaguna jawaabkayaga ayaanu ka qaadanaynaa, waxaana u aragnaa inay
doonayaaan inay carqaladeeyaan nabada iyo deganaashiyaha ka jira
Somaliland”ayuu yidhi Saylici.
Sidoo kale, Gudoomiyaha xisbiiga UCID Eng:Faysal
Cali Waraabe ayaa socdaalkaasi Cabdiwali Gaas ku tilmaamay daandaansi iyo in
deegaanadaaasi dagaal kale ka qarxo.
Dhinaca kale, xukuumada iyo labada xisbi qaran
ayaa sheegay in maalmihii u dambeeyey ka wada hadlayeen sidii doorashooyinka golaha
Deegaanka iyo Baarlamaanku u dhici lahaayeen wakhtigii loogu tallogalay,
waxaana ay sheegeen in Toddobaadka soo socda ay xisbiyaddu la kulmi doonaan
madaxweynaha sidii loogu heshiin lahaa waxyaalaha la isku hayo ee xisbiyada iyo
xukuumaddu ku kala duwan yihiin loo dhamayn lahaa.
Barkhad-ladiif M. Cumar, Hiiraan Online
[email protected]
Hargeysa, Somaliland.
