Xilal iska qaadistii mas’uuliyiinta Galmudug oo wali halkeedii ka sii socta
Talaado, September, 18, 2018 (HOL)–Guddoomiye ku-xigeenka koowaad ee baarlamaanka Galmudug Xareed Cali Xareed ayaa waxba kama jiraan ku tilmaamay in xildhibaanno fadhi ku yeeshay degmada Cadaado ka qaadeen xilkii ku-xigeenka koowaad ee guddoonka baarlamaanka.
Guddoomiyaha Baarlamaanka
Galmudug oo Khamiistii todobaad hore xilkii laga qaaday ayaa degmada Cadaado ka
sheegay in xildhibaanno gaaraya 30 xildhibaan u soo gudbiyeen mooshin ka dhan
ah guddoomiye ku-xigeenka koowaad ee baarlamaanka Xareed Cali Xareed, doodd
dheer kaddib-na xildhibaannadu isku raaceen in cod la galiyo.
‘’Markii ay ka doodeen kaddib
waxey codsadeen in cod la galiyo, cod ayaan galinay, xildhibaannada kulanka
fadhiyay waxey ahaayeen 48 dhamaantood waxey u codeeyeen in kalsoonidii ay kala
laabteen guddoomiye ku-xigeenka koowaad ayuu yiri’’ Cali Gacal Casir.
Laakiin Xareed Cali Xareed ayaa
ku tilmaamay hadalka Cali Gacal Casir mid aan sharciga waafaqsaneyn, isaga oo
sheegay in uusan aheyn guddoomiyaha baarlamaanka Galmudug maadaama ayuu yiri
kol hore xildhibaannada Galmudug fadhi ay ku yeesheen Dhuusa-Mareeb kalsoonidii
kala noqdeen.
‘’Cadaado xildhibaanno aan ka
badneyn 11 ayaa ku sugan oo la ogyahay magac-yadooda iyo aqoonsiyadooda intaba,
sidaa daraadeed waxaa meeshaa kaga cad in arintu fowdo iska tahay, Cali Gacal
Casir –na sabab uu kulan u shir guddoomiyo ma jirto, sababtoo ah ma’aha
guddoomiyaha baarlamaanka Galmudug oo kol hore ayaa kalsoonidii lagala noqday
ayuu yiri’’ Xareed.
Waxaa uu intaa ku daray in
Dhuusa-Mareeb looga dhawaaqay guddi doorasho oo ka shaqeyn doona sidii loo heli
lahaa guddoomiyihii badali lahaa Cali Gacal Casir.
Dowladda Soomaaliya ayaa ugu
baaqday dhinac-yada iska soo horjeeda ee maamul gobolleedka Galmudug in ay
joojiyaan mooshinnada iyo xil ka qaadista intaba.
C/raxmaan Diini, Hiiraan
Online
[email protected]
