Madaxweyne Biixi oo amaanay dadka reer Puntland
Sabti, May, 19, 2018 (HOL) – Madaxtooyada
Somaliland ayaa xalay casho sharafeed iyo afur ugu tallogashay in lagu xuso 18
May u samaysay qaybo ka mid ah madaxda Somaliland, waxaana lagu bedelay
munaasibadihii madaxtooyadad lagu dhigi jirey ee heesaha iyo Rawaadayaha lagu
qaban jirey.
Madaxweyne Muuse Biixi ayaa sheegay hadii
Soomaaliya diidan tahay xadkii Ingiriisku dhigay ay u dacwooto Un-ta iyo
midowga Afrika oo uu sheegay in afriki ku kala socoto xadkiii uu guamystuhu u
sameeyey.
“Somaliland waxa ay ku aasaasantay nabad
iyo inay dalkeeda horumar, barwaaqo iyo nabad ka samayso oo jaarkeedana nabad
kula noolaato, Somaliland ka ugu yar iyo ka ugu weyn caqligoodu waxa uu ku
dhisan yahay nabad iyo wax qabsasho, xadka Somaliland annagu ma aanu samayne
waa ka ay Afrika oo dhammi ku dhisan tahay ee ku kala socoto, annaguna waxa
aanu rabnaa inaanu xadkayagii nabad ku tagno, dalkayagana nabad ku maamulno,
dawladda Soomaaliya ee diiddan xadkii Afrika isticmaarku u qaybiyey waxa ay u
baahan tahay inaanay annaga kolba nasoo weerarine inay Jimciyadda quruumaha ka
dhaxaysa iyo midowga Afrika u sheegto inay diideen xeerkii Afrika dhigatay
1963-kii ee ay imika ku shaqayso.”ayuu yidhi Biixi.
Madaxweyne Biixi wuxuu fariin u direy Reer
Puntland, waxaanu yidhi “ Waxaanu u aragnaa dadka aanu jaarka nahay ee reer
puntland dad gob ah oo xariir ah, odhan mayno waa wuxuush iyo waa dugaag ee dad
waxgarad ah baanu u naqaanaa, dagaalkaasi la soo qaadayna uma aragno mid
faa’iido ku jirto, uma soo socono dhibaatadiina magaaladda Garoowe uma
soo socono waa magaalo soomaaliyeed oo camirane alla ha u siyaasiyo, anagu
xadkii Somaliland baanu doonayna in aanu nabad ku nimaadno, ciidamdaasi
halkoodii joogayaan wixii ku soo duullana way iska celinayaan”
Mar uu ka hadlayey dagaalka u dhexeeya labada
beelood ee Ceel-Afweyn waxa uu yidhi “dadkaas dagaalamaya shaydaan baana ka
dhex booday, xukuumad ahaanna waxaanu fulinaynaa wax kasta oo ay ku kacayso in
nabadda lasoo celiyo, nin kasta oo nabadda ka hor yimaadda waanu la
dagaallamaynaa, marka hore waanu u digaynaa, waanu qabanaynaa waanu xidhaynaa,
hadduu dagaallomana waanu la dagaallamaynaa oo nabadda waanu ku dagaallamaynaa,
ninowna qorigaaga ciidanka haku soo jeedin,”
Sidoo kale, waxa halkaasi ka hadlay madaxweynihii
hore ee Daahir Rayaale, gudoomiyaha Guurtidda, Cali Khaliif Galaydh iyo
wakiilka Itoobiya u jooga Somaliland, dhamaantood waxay ka hadlayeen xuska 18
May.
Barkhad-ladiif M. Cumar,
Hiiraan Online
[email protected]
Hargeysa, Somaliland.