Ciidamada Amaanka dalka Masar oo xiray dhalinyaro Soomaaliyeed
Talaado, Maarso, 13, 2018 (HOL)-Ciidamada Amniga dalka Masar ayaa xirxiray
dhalinyaro Soomaaliyeed oo dhalinyaro Soomaaliyeed, kaddib howlgal ay ka
sameeyeen qeybo ka id ah xaafadaha degmada Nasri City oo ah meel si weyn
Soomaalida ay u degan yihiin.
Sida ay xaqiijiyeen Jaaliyadda Soomaalida ah ee ku nool magaalada Qaahira ciidamada
Amniga oo aad u hubeysan ayaa gudaha u galay maqaaxida Soomaalida iyaga oo
dadka weydiinayay sharciyada ay ku joogaan dalkaasi, waxayna soo xireen 17 dhalinyaro
Soomaali ah.
Soomaalida la xir xiray waxaa ku jira wiil asalkiisa uu Soomaali yahay balse
heysta dhalashada dalka Mareykanka, waxaana socda dadaalo lagu soo deynayo
dhalinyaradan.
Dadka la xir xiray oo isugu jira Arday iyo Qaxooti ayaa waxaa loo gudbiyay
saldhig ku yaalla degmada Nasri City, si loo hubiyo in ay yihiin dad sharci ku
jooga dalka Masar.
Bilihii ugu dambeeyay Dowladda Masar ayaa bilowday in ay xabsiyada dhigto
ajaanibta dalkeeda ku sugan ee aanan heysan deganaanshaha dalkaasi.
Sanadkii tagay 2017 dalka Masar waxaa lagu xir xiray Soomaali Boqolaal
gaareysa, xilliyo kala duwan, kuwaasi oo isugu jiray Arday, Qaxooti iyo dad
kale oo caadi ah, waxaana Soomaaliya loo soo tarxiilay dadkii sida caadiga ahaa
u joogay dalkaasi.
In ka badan 5,000 oo qof oo Soomaali ah ayaa ku nool dalka Masar, kuwaasi oo
siyaabooyin kala duwan u jooga halkaasi, kuna heysta nolol ku filan.
C/raxmaan Diini, Hiiraan Online
[email protected]
