Xildhibaannada gollaha shacabka oo Ansixiyay heshiiskii Maxaabiis is dhaafsiga Soomaaliya iyo India
Sabti, October, 14, 2017 (HOL) – Xildhibaannada golaha shacabka ee
Baarlamaanka Federaalka ayaa maanta ansixiyay heshiiska maxaabiis isu celinta
ee dhex maray Soomaaliya iyo Hindiya, kaasoo ay soo saxiixday Wasaaradda
Arrimaha dibadda Xukuumadda Soomaaliya.
Kulanka Xildhibaanada Golaha shacabka oo ay soo xaadireen illaa 161
Xildhibaan ayaa waxaa shir guddoominayay Guddoomiye Maxamed Sheekh Cusmaan.
Xildhibaanada ayaana cod aqlabiyad leh ku ansixiyay heshiiska is dhaafsiga
Maxaabiista ee Soomaaliya iyo Hindiya, ma jirin xildhibaan diiday ama ka
aamusay.
Guddoomiyaha Baarlamaanka ayaa sheegay in heshiiskan uu yahay mid ansax ah,
iyadoo wixii hada ka dambeeya loo gudbi doono in la dhaqan geliyo, marka uu
saxiixo Madaxweyne Farmaajo.
Wasiirka Arrimaha Dibadda Soomaaliya Yuusuf Garaad ayaa bishii August
heshiis ku aadan is dhaafsiga Maxaabiista la saxiixday Wasiirka Arrimaha
Dibadda Hindiya.
Heshiiskan ayaa dhigaya in maxaabiista Soomaalida ee xukunka ku dhacay in
loo soo wareejiyo dalkooda oo ay ku dhameystaan xukunkooda.
Xabsiyo ku yaalla dalka Hindiya ayaa waxaa ku xiran maxaabiis gaaraya boqol
maxaabiis, oo loo heysto dambiyo la xiriira burcad badeednimo.
C/raxmaan
Diini, Hiiraan Online
[email protected]
