Dowladda Soomaaliya oo sheegtay in ay wax ka qabaneyso Fatahaadda uu sameeyo Wabiga Shabeelle
Arbaco, October, 11, 2017 (HOL) - Wasiirka
Wasaaradda Tamarta iyo Kheyraadka Biyaha Xukuumadda Federaalka ah ee Soomaaliya
Saalim Caliyow Ibroow ayaa sheegay in ay wax ka qabanayaan fatahaadda uu inta
badan sameeyo Wabiga Shabeelle.
Wuxuu sheegay arrintan in ay iskala shaqeyn doonaan Wasaaradaha maamul
goboleedyada ee mataanaha la ah Wasaaradda Tamarta iyo Kheyraadka Biyaha
Xukuumadda Federaalka.
Sidoo kale Wasiir Saalim Caliyow Ibroow ayaa sheegay in rajeynayaan sanadka
dambe xilligan oo kale in ay yaraan doonaan fatahaadaha ay sameynayaan
Wabiyada, maadaama uu tilmaamay in ay galeen heshiiyo lagu dayactirayo.
“Wasaaradda qorshaha waxaa ugu jira in dayactir weyn lagu sameeyo Wabiyada,
in la soo nooleynayo biyo xireenada, wasaaradaha Dhiggeena ah ee Dowlad
goboleedyada waan u sheegnay” ayuu yiri Wasiir Ibroow.
Wabiga Shabeelle ayaa dhowaan fatahaad ka sameeyay tuulooyin hoostaga
degmada Jowhar ee gobolka Shabeellaha Dhexe, kaasi oo khasaare u geystay
Beeraleyda ku nool hareeraha Wabiga.
C/raxmaan Diini, Hiiraan Online
[email protected]