ICRC : Afar bilood oo kaliya ayaan heysanaa si looga weecdo macaluul dhacda
Khamiis, Maarso, 23, 2017 (HOL) – Hay’adda ICRC ayaa
sheegtay in saddex ilaa afar bilood oo kaliya la heysto si looga hortago ama
looga badbaadiyo macaluul dhacda nolasha malaayiin ruux oo ku dhaqan saddex dal
oo Africa ah iyo Yemen.
Hay’addaha gargaarka ka shaqeeya ayaa wali u sii baahan $
300 oo Million si loo gargaaro ilaa shan Milyan oo ruux oo ku dhaqan dalalka
Soomaaliya Yemen, W/Bari Nigeria iyo
Koonfurta Suudaan, halkaa oo laga soo sheegayo abaarta ba’an.
“Xaaladda ma ahan sidii caadiga ahayd. Labaatan milyan oo qof oo wajahaya
macluul ma ahan wax aan maalin kasta aragno, sidaas darteed waxaan u
baahannahay inaan hadda tallaabo qaadno. Haddii aan tallaabo qaadno hadda, gaar
ahaan Somalia iyo Yemen, macluusha waa la weecin karaa” waxaa sidaas yiri
agaasimaha howlgalada ICRC Dominik Stillhart.
Waxaa uu intaa ku darray in hay’adaha gargaarka iyo deeq bixiyayaasha looga
baahan yahay inay cashar ka bartaan wixii dhacay 2011, markaasi oo laga daahay
in jawaab laga bixiyo macluushii Somalia, taasi oo dishay 260,000 oo qof, oo in
ka badan bar ay ahaayeen caruur ka yar shan sano jir.
ICRC ayaa waxay billowday codsi ay ku dooneyso 400 oo milyan oo dollar si ay
cunno, biyo, meel ay ku hoydaan iyo daryeel caafimaad u siiso shan milyan oo
qof oo ah dadka ugu baylahan ee ku nool afar dal oo ay macluusha saameyneyso.
C/raxmaan Diini, Hiiraan Online
[email protected]
