Madaxweynayaasha Soomaaliya iyo Kenya oo kulmay +Sawirro
Khamiis, Maarso, 23, 2017 (HOL) –Madaxweynaha dowladda Soomaaliya Maxamed Cabdullaahi
Farmaajo ayaa si diiran loogu soo dhaweeyay xarunta madaxtooyada dalka Kenya,
halkaasoo uu kulan albaabada u xiran yihiin kula qaatay dhiggiisa Uhuru
Kenyatta.
Madaxweyne Farmaajo ayaa si maqaam sare ah loogu
soo dhaweeyay aqalka madaxtooyada, waxaana ay salaan ka qaateen iyaga oo wada
jira labada madaxweyne cutubyo ka tirsan ciidamada Kenya.
Kulanka oo ah mid gaar ah ayaa la filayaa in ay labada madaxweyne ugu wada hadlaan arimo la
xiriira, qaxootiga, abaarta, siyaasada, xiriirka labada dal iyo dagaalka ka
dhanka ah Al-shabaab.
Madaxweyne Farmaajo iyo Uhuru Kenyatta aya lagu wadaa in ay saxiixaan hishiis labo geesood ah kulankooda kaddib, waxaana la
filayaa in ay warbaahinta la hadlaan.
Booqashada madaxweyne Farmaajo oo ah mid saddex
cisho qaadan doonta ayaa sidoo kale waxaa qeyb ka ah kulan madaxeedka wadamada
urur gobolleedka IGAD oo ka furmaya maalinta Sabtida ah magaalada Nairobi ee
dalka Kenya.
Kulanka oo ay ka soo qeyb-gali doonaan madaxda
wadamada ku jira urur gobolleedka ayaa la filayaa in looga wada hadlo
arimaha bani’aadannimada iyo xasaradaha siyaasadeed ee ka oogan guud ahaan gobolka.
C/raxmaan Diini, Hiiraan Online
[email protected]