Xabaal wadareed ay ku aasnaayeen 17 qof oo laga helay magaalada Berbera
Isniin, Maarso ,20, 2017 (HOL)- Todoba iyo toban qof oo laga helay xabaal wadareed lagu
duugay oo ku taalla xaafadda Burco Sheekh ee magaaladda Berbera, ayaa aas qaran loo sameeyey kadib markii
qof walba lafahiisa gaar la iskugu xirxiray
laguna aasay xabaalo ku yaalla koonfurta magaaladda.
Wasiirka Cadaaladda, wasiirka
Diinta iyo Aw qaafta, wasiiro kale, maayarka Magaaladda Berbera iyo guddida
daba galka xasuuqyadii wadanka ka dhacay ayaa ka qaybgallay jinaasadda loo
sameeyey dib u aasitaanka dadkan xabaalo wadareed lagu aasay laga soo
foqay,isla markaana loo sameeyey qaabkii shareecaddu qabtay oo ah in maytidda
la xurmooyo oo goobo ku haboonna lagu
aaso.
Xabaal wadareedkan dhawaanta la
helay oo koox caalami ahi xaqiijiyeen, islamarkaana soo foqeen 17 qof oo
dawladdii Siyaad Bare ku laysay dad shacab ah oo aan waxba galabsan ayaa dib
qof walba gaar loogu aasay.
Guddoomiyaha guddida baarista
xasuuqyadda Soomaaliland Khadar Like ayaa sheegay in dadkan la xasuuqay ee xabaal
wadareedka laga helay loo aasayo sidii shareecaddu qabtay, isla markaana ay
waajib ku leeyihiin dadka in si wanaagsan loo aaso.
“Waxaanu halkan iskugu nimid in
aynu xaqoodii u gudno intii aynu kari karaynay, todoba iyo toban dhalinyaro u
badan, oo lagu xasuuqay xaafada la yidhaa Burco Sheikh ee magaaladda Berbera oo aynu dib ugu
aasayno, xuquuqdii ay lahaayeen ee aynu kari karno, iyadoo gacan ka xaqdaran
dishay.”ayuu yidhi gudoomiyaha guddida xasuuqa Khadar Like.
Gooob-jooge wakhtigaasi dadka la
xasuuqayey joogay ayaa ka warbixiyey qaabka waagaasi dadkan loo laayey, waxaanu
yidhi “Anigu waan joogay habeenkii dadkaasi la laayey magaaladda Berbera ayaan
joogay,inkastoo dalka oo dhan dadka inta la iska qabto la laynayey oo Hargeysa
iyo Burco marka dadka la laynayey inta la kaxaysto ayaa la waayi jiray laakiin
tan Berbera waxay kaga duwanayd inta dadka makhaayadaha Burco Sheikh laga
kaxaysto ayaa makhayadda dhabarkeedda lagu layn jiray meeshii lagu laayey ayaa
lagu aasay, marka taasi xanuun gaar ah ayey lahayd”
“maanta Somaliland aarsan mayso
waayo dee dadkan dadkii laayey rajiim gaar ah ayuu ahaa, rajiimkaas waxa ka
dambeeyey afar madaxweyne oo Soomaaliya soo maray, labadii hore ku meel gaadh
bay ahaayeen, laakin madaxweynihii hore ee Soomaaliya Xassan Sheekh iyo Farmaajo waxay
ahaayeen laba madaxweyne oo imika loo aqoonsaday dawlad, waxaa lagaga gami’i
karaa dadkii dadkaasi laayey waa la garanayaa in madaxweynaha hadda jooga uu
qiro in dadkaasi la xasuuqay waayo amar dawladeed ayaa dadkaasi lagu
laayey”ayuu yiri Wasiirka cadaalada Somaliland Axmed Faarax Cadare
Wasiirka Diinta iyo Aw qaafta
Sheekh Khaliil Cabdilaahi oo isna ka qaybgalay aaska loo sameeyey dadkaasi la
xasuuqay waxa uu yidhi “ waxay aaskan qayb ka yahay in qofka la garto iyo in
meel baydhsan lagu aaso waa gargarka qofka maydka ah la siiyo, marka waa la
garanayaa dadkii laayey oo wali way nool yihiin oo waxay ku adkaysanayaan in
dadkaasi ahaayeen kuwo ku soo duulay dawladdii markaasi, marka raga Nool ee
wali meelahaasi ka hadla ee Morgan ka mid yahay waa in sharciga la saraa”
“imika Berbera haddii aad
buurahaasi tagtid waxaad arkaysa xabaalo wadareed dad reer miyi ah oo lagu
laayey oo dadkii deegaanku lku odhanyaan iyagoo xoolahoogii wata ayaa la laayey,
dadkii waxaasi gaystay waa la garanayaa dadkay sii dhaleena waa lagaranayaa,
madaxweynaha dadkiisa laaya waa la daba gala oo tafiirtiisa uun baa iyaguna la
laayaa”ayuu yidhi Maayarka Berbera Cabdishakuur Cidin.
Xabaal wadareedkan cusub ayaa noqonaysa
tii ugu dambaysay ee muddooyinkan dambe la helo, waxaana xaqiijiyey baadhay dhakhaatiir ku takhasusay dadka la
xasuuqo oo maalmihii u dambaysay wadanka ku sugnaa.
Barkhad-ladiif M. Cumar,
Hiiraan Online
[email protected]
Hargeysa, Somaliland.
