Uhuru Kenyatta oo amaanay howlgalka ciidamada Kenya ee Soomaaliya
Axad, Maarso, 19, 2017 (HOL) – Madaxweynaha dowladda Kenya Uhuru Kenyatta oo
booqasho lama filaan ah maalintii shalay ku tagay xerada militari ee ugu weyn
ciidamada Kenya ee qeybta ka howlgalka midowga Africa ee ku taala degmada
Dhoobley ee gobolka Jubbada hoose, ayaa amaanay howlgalka ciidamada
Kenya.
Uhuru Kenyatta ayaa ku tilmaamay howlgalka mid naf hurnimo ah
oo sida uu hadalka u dhigay lagu difaacayo nolasha dadka oo ay ka mid yihiin
shacabka reer Kenya.
‘’Waxa aad halkan u joogtaan waa in aad badbaadisaan nolasha
dadka iyo shacabka Kenya intaba, islamarkana dadka ka xoreysaan cabsida
Al-shabaab’’ ayuu yiri madaxweynaha dalka Kenya Uhuru Kenyatta.
Waxaa uu sheegay in dowladda cusub ee Soomaaliya ka
rajeynayaan in ay xoogga saarto dhismaha ciidamado Qaran si dalkooda ay
dib ugu laabtaan ciidamada AMISOM oo ay qeyb ka yihiin kuwa Kenya.
Madaxweyne ku-xigeenka maamulka Jubbaland Max’uud Siyad
Aadan oo warbaahinta la hadlay ayaa dhinaciisa beeniyay in madaxweynaha Kenya
uu booqday degmada Dhoobley.
C/raxmaan Diini, Hiiraan Online
[email protected]