Madaxweyne Siilaanyo oo xariga ka jaray qayb cusub oo lagu kordhiyey cisbitaalka Hargeysa
Sabti, Maarso ,18, 2017 (HOL)- Madaxweynaha Somaliland, Axmed Maxamed Siilaanyo ayaa maanta xadhiga ka
jaray xarun cusub oo noqon doonta qaybta
gurmadka degdeg ah ee cisbitaalka guud ee magaaladda Hargeysa lagu kordhiyey,
waxa kale oo uu dhagax dhigay xarun cusub oo noqon doonta hooyada illaa
cisbitaalka guud ee magaaladda Hargeysa oo isku jira ilaa toddoba boqol oo
mitir.
Xarunta gurmadka degdeg ah ayaa la
dhisay 1953 kii, tan iyo wakhtigaasi waxba laguma kordhin, marka laga reebo
xaruntan cusub ee hadda lagu kordhiyey.
Cisbitaalka guud ee magaaladda Hargeysa
ayaa dhismayaashiisu u badan yihiin kuwii la dhisay wakhtigii Ingiriisku
maamuli jiray Somaliland, waxaana xaaladda guud ee cisbitaalka ka warbixiyey
agaasiamaha cisbitaalka Dr: Askar.
Madaxweynuhu waxa uu xadhiga ka jaray
xarun cusub oo loogu talogalay inay noqoto qaybta gurmadka degdega ah ee
cusbitaalka guud yeelan doono taasi oo qaadi doonta 50 qof markiiba una qaybsan
laba qaybood oo kala ah haweenka iyo raga, madaxweynaha oo xadhig ka jarista ka
dib kormeeray ayaa u mahadnaqay cid kasta oo qayb ka qaadatay dhismahan
balaadhan ee aadka loo qurxiyey.
Sidoo kale, waxa iyaguna halkaasi ka
hadlay Wasiirka Maaliyada, Wasiirka Caafimaadka, Maayarka Caasimada Hargeysa
iyo masuuliyiin kala duwan oo dhamaantood iska daba maray faa’iidada uu yeelan
doonto xaruntani cusubi. Waxaana xusid mudan in maayarka caasimada Hargeysa
oo hore 50,000 oo doolar ugu deeqay
qaybtaasi dhamaatay uu maanta qaybta labaad ee madaxweynuhu u dhagax dhigay
hooyada iyo dhalaanka uu ugu deeqay lacag dhan 20,000 oo Doolarka maraykanka
ah.
Ugu danbayn Wasiirka Maaliyada Marwo
Samsam Cabdi Aadan ayaa laba gaadhi oo nooca Ambulance -ka loo yaqaano ku
wareejisay xaruntaasi cusub iyadoo xustay in aan meel kale loo isticmaalin
balse ay ka hawlgalaan looguna gurmado xaaladaha degdega ah ee caasimada iyo
nawaaxigeeda ka soo kordha.
madaxweynuhu wuxu xusay ahmiyada ay
qaran u leedahay balaadhinta iyo dayactirka cusbitaalka guud ee dalku, isagoo
madaxweynuhu gacan muuqata ku leh guud ahaan tayeynta iyo dhismayaasha
cusbitaalada dalka ayuu hadana awooda saaray in cusbitaalka guud ee caasimadu
noqdo mid ka kora halkii uu kaga tegay Ingiriisku wakhtigii uu xukumi jiray
Somaliland.
Barkhad-ladiif M. Cumar,
Hiiraan Online
[email protected]
Hargeysa, Somaliland.