Xildhibaannada baarlamaanka oo meel mariyay qarraarka ku aadan gurmadka abaaraha
Sabti, Maarso, 18, 2017 (HOL) - Xildhibaannada Golaha
Shacabka Jamhuuriyadda Federaalka Soomaaliya ayaa maanta meel mariyey qaraar ku
aadan gurmadka abaaraha dalka, kaasi oo mudooyinkan ay ka doodayeen xildhibaannada
Fadhiga xildhibaannada baarlamaanka ayaa ugu horeynba la guda-gallay
dhameystirka dooda qarraarka gurmadka abaaraha dalka oo ay maalmahan ka
doodayeen xildhibaannada Golaha Shacabka waxaana ay tallooyinka mudanayaasha ku
qotomeen in la xoojiyo gurmadka abaaraha iyo in la sugo qaabka gurmadka loo
sameeynayo ayadoo guddiyada ku shaqada leh ay baarlamaanka la wadagayaan xogta
halka ay mareyso gurmad sameynta.
Guddoomiye ku xigeenka labaad ee Golaha Shacabka Mudane Mahad Cabdalla Cawad
ayaa dhinaca kale xildhibaannada Golaha Shacabka uga war bixiyey kulan ay
guddoonka Golaha Shacabka la qaateen Madaxweynaha Jamhuuriyadda iyo
Ra’isulwasaaraha kaasi oo ku aadanaa xoojinta gurmadka abaaraha dalka iyadoo
xildhibaanada Golaha Shacabkana ay ka qeyb qaadanayaan .
Qarraarka ayaa lagu meel mariyay codeyn gacan taag aheyd waxaana natiijada ku
dhawaaqay Guddoomiyaha Golaha Shacabka Mudane Maxamed Sheekh Cusmaan “Jawaari” oo
shirka Guddoominayey.
Ugu danbeytii, marka laga soo tago meel marinta qaraarka gurmadka abaaraha
dalka waxaa ay xildhibaannada golaha baarlamaanku qaateen kulan ay si hoose ugu
eegayeen xaaladda dalka kaasi oo ay saxaafaddu dibad joog ka aheyd.
C/raxmaan Diini, Hiiraan Online
[email protected]