Saraakiisha gobolka Hiiraan oo ka hadlay dil qof rayid ah xalay loogu geystay magaalada Beledweyne
Sabti, Maarso, 18, 2017 (HOL) – Saraakiisha ciidamada dowladda
gobolka Hiiraan ayaa faah faahin dheeraad ah ka bixiyay dilka wiil dhalinyaro
ah oo darwal ka ahaa gadiidka [Bajaajka] oo askari ka tirsan ciidamada dowladda
uu xalay ku toogtay xaafadda Buundo-weyne ee gobolka Hiiraan iyo dhaawac kooxo
hubeysan u geysteen macalin dugsi Qur’aan.
Taliyaha qeybta booliiska degmada Beledweyne Col Cali Dhuux
Cabdi Mahad Alla ahaa u sheegay HOL in kooxo bastoolado ku hubeysan xaafadda
Xaawo-Taako ku dhaawaceen macalin dugsi Qur’aan.
Mar uu ka hadlay dilka wiilka dhalinyarada ah ayuu yiri ‘’
Wiil dhalinyarro ah oo watay gaari Bajaaj ayaa ka daba-yimid askar ka tirsan
ciidamada asluubta maamulka gobolka Hiiraan waa ay ka shakiyeen, waxaa ay isku
dayeen in ay joojiyaan, laakiin waa ku soo dhaqaaqay intaa kadibna mid ka mid
ah askartii ay xabad riday oo dishay wiilkaa dhalinyarrada ah.
Taliyaha ayaa sheegay in arintan ay ku hayaan baaritaan
dheeraad ah islamarkaana sida uu hadalka u dhigay gacanta lagu soo dhigay
askarigii falka dilka ah geystay.
Mar uu soo hadal qaaday dhaawaca macalinka ayuu sheegay'' Ragga toogashada ku dhaawacay macalinka waxaa ay ahaayeen dhalinyaro laga shakiyay oo dadku ay weydiiyeen wax ay yihiin, hasse ahaatee markii su'aashaa la weydiiyay kadib ayeey rasaas ku jawaabeen taasoo keentay ayuu yiri in uu macalinka ku dhaawacmo''
Ugu danbeyntii, gadiidka yar yar ee Bajaajka oo ah gadiidka ugu badan ee xiliyada habeenkii shaqeeya guud ahaan marka la eego Soomaaliya, waxaana inta badan dhacda in ciidamada dowladda iyo
wadayaasha gadiidkan uu soo dhax gallo ismaadhaaf ugu danbeyntii sababa dil.
C/raxmaan Diini, Hiiraan Online
[email protected]