Ciidamada Booliska ee gobolka Awdal iyo dad Taageersan fanaan Nimcaan Hilaac oo iska horimaad ku dhexmaray Boorama
Axad,December, 17, 2017 (HOL)- Hal qof ayaa ku dhaawacmay iska
hor imaad ku dhexmaray magaaladda Boorama ciidamada booliska iyo dad cadhaysan
oo taageersan Fanaanka Caanka ah ee Nimcaan HIlaac oo ciidanku doonayeen inay
xidhaan.
Ciidamada booliska ayaa rasaas ay
ku kala dareerinayeen dadka ku dhaawacantay qof haweenay ah, taas oo
cisbitaalka Boorama la dhigay, waxaana taasi keentay inay dadku mudaharaad ay
taayiro ku gubayaan oo ay wadooyinkii kala xidhaan.
Ciidamada booliska ayaa guriga
Nimcaan Hillaac tagay si ay usoo xidhaan, haseyeeshee markii ay waayeen waxay
xabsiga u taxeen aabihii iyo gabadh ay walaalo ahaayeen sida ay warbaahinta u
xaqiijisay hooyaddii dhashay Nimcaan hilaac.
“ciidamada booliska ayaa guriga
noogu yimid markii ay fanaankii waayeen ayey dadkii meesha joogay budad la
dhaceen, waxaana hadda xidhan Nimcaan Hilaac Aabihii, walaashii iyo wiil uu
abti u yahay, saddexda qof ayaa hadda naga xidhan, isagiina ma joogo”sidaas
waxa tidhi fanaanka hooyadii oo warbaahinta ka hadashay.
Fanaan Nimco Hilaac ayaa muddo
laba sanno ah ka maqnaa Somaliland, waxaana Boorama ka soo galay dhinaca lugta
isagoo soo maray magaaladda Lawyo caddo oo ah xadka u dhexeeya Jabuuti iyo
Somaliland, isagoo baryahan dambe joogay magaaladda Jabuuti ka hor inta aanu ka
iman magaaladda Muqdisho.
Wararku waxay sheegayaan in aanu fanaanku markii uu soo galay aanu
cafis waydiisan, isla markaana la arkay uun isagoo Boorama jooga, ka dibna
ciidanku isku dayeen inay soo qabteen,waxaana la sheegayaa inuu illaa hadda
dhuumasho ku dhex joogo magaaladda Boorama.
Barkhad-ladiif M. Cumar,
Hiiraan Online
[email protected]
Hargeysa, Somaliland.
