Madaxweyne Farmaajo iyo wafdi uu horkacayo oo u anbabaxay dalka Turkiga
Talaado, April, 25, 2017 (HOL) – Madaxweynaha dowaladda Soomaaliya Maxamed
Cabdullaahi Farmaajo iyo wafdi uu horkacayo ayaa goor dhaw ka anbabaxay garoonka
diyaaradaha magaalada Muqdisho iyaga oo ku sii jeeda dalka Turkiga.
Wafdiga madaxweynaha ayaa waxaa ka mid ah xubno ka tirsan labad golle ee
dowladda, waxaana garoonka diyaaradaha ku sii sagootiyay mas’uuliyiin ka tirsan
dowladda iyo saraakiil ciidan.
Madaxweyne Maxamed Farmaajo ayaa inta uu ku sugan yahay dalka Turkiga waxaa
uu kulamo la qaadan doonaa masuuliyiinta Turkiga oo uu ugu horeeyo madaxweynaha
dalka Turkiga Recep Tayyip Erdogan.
Sidoo kale Madaxweynayaasha Soomaaliya iyo Turkiga ayaa ka wada hadli doona
arrimaha abaaraha, amniga iyo sidii loo xoojin lahaa xiriirka ka dhaxeeya
labada dal.
Safarkan Madaxweynaha uu ku aaday dalka Turkiga ayaa noqonaya midkiisii
shanaad ee uu uga baxo dalka, tan iyo markii la doortay 8-dii Febraayo ee
sanadkan.
C/raxmaan Diini, Hiiraan Online
[email protected]