Madaxweyne Farmaajo oo la kulmay ehelada marxuum uu gaari ku jiiray illinka madaxtooyada
Isniin, April, 24,
2017 (HOL) – Madaxweynaha dowladda Soomaaliya Maxamed Cabdullaahi Farmaajo ayaa
maanta xarunta madaxtooyada ku qaabilay ehelada marxuum Tahliil Jimcaale
Hubbane oo maalintii shalay ku jiiray
ilinka hore ee madaxtooyada Soomaaliya mid ka mid ah gadiid galbinayay
madaxweynaha.
Dhacdadan oo markii hore aysan warbaahintu si faah faahsan
uga hadlin ayaa markii danbe la ogaaday kaddib markii la sheegay in qoyska
marxuumka looga yeeray xarunta madaxtooyada Soomaaliya.
Kulanka madaxweynaha uu la yeeshay ehelada marxuumka
geeriyooday ayaa waxaa goob joog ka ahaa wasiirka wasaarada warfaafinta Eng
C/raxmaan Cumar Cismaan Yariisoow iyo xubno ka tirsan howlwadeennada wasaarrada
oo la sheegay in marxuumka dhintay uu ka tirsanaa.
“Marxuumka naxariistii janno Alle haka waraabiyo, qadar ayuu ku dhintay, dowladda
Soomaaliya way ka garaabeysaa geerida marxuumka, ehelkana waan la qeybsanayaa
tiiraanyada, sida uu shilku ku dhacay baaris ayaa ku socoto waxaana idiin
ballanqaadayaa in xuquuqda marxuumka aysan dowladdu meel cidlo ah kaga dhaaqiqo
doonin”ayuu yiri madaxweynaha.
Cabdi Jimcaale Hubane la dhashay marxuumka dhintay ayaa ayaa mahadcelin weyn u jeediyay Madaxweynaha
JFS Mudane Maxamed Cabdullaahi Maxamed Farmaajo, wuxuuna arrin ugub ku ah
Soomaaliya ku tilmaamay sida loo ixtiraamay qoyskooda, dowladda Soomaaliyana
uga garoowday shilka uu ku geeriyooday marxuub Tahliil Jimbaale Hubane.
Marka laga soo tago marxuumka dhintay warar soo baxaya ayaa sheegaya in
shilkaas sidoo kale ay ku dhaawacantay qof dumar ah.
Inkastoo shilalka noocan oo kale ah ku badan yihiin magaalada Muqdisho
hadana tallaabadan ayaa noqoneysa tii ugu horeysay oo ay qaado madaxtooyada
Soomaaliya.
C/raxmaan Diini, Hiiraan Online
[email protected]
