Dowladda Britain oo ka hadashay shirka Soomalida loogu qabanayo London
Sabti, April, 22, 2017 (HOL) - Dowladda Britain ayaa heshiiskii dhawaan ay
gaareen madaxda DF iyo hogaamiyayaasha maamul gobolleedyada ku tilmaamtay mid
taariikhi ah oo dhabbaha u xaaraya in ciidamada Federaalka iyo kuwa maamul
goboleedyada wadajir uga shaqeynayaan si cad qorshaha ammaanka qaran, si ay
tartartiib u qaataan masuuliyada hogaanka si nabad loo helo.
Warsaxadeedka waxaa lagu xusey in dawlada UK ay door muhiim ah ka qaadanayso
taageerada caalamiga ah ee amni ku soo celinta Soomaaliya, iyadoo dhaqaalahan
cusub ee taageerada uu yahay mid kale oo dheeraad ku ah gagaarka uu hadda
bixiso dawlada UK ee ay ka mid tahay tababarka ay ciidamadda British-ka siiyaan
ciidamadda qaranka Soomaaliya iyo kuwa midowga Afrika, tababarida Booliiska iyo
hawlaha xasilinta iyo waliba ka hortaga ficiladda xagjirnnimadda.
Warkan ayaa waxaa lagu yiri; Amaanka wuxuu noqon doonaa mowduuca ugu
muhiimsan shirka Soomaalida ee London lagu qabanayo 11-ka May, kaas oo isku
keenaya dawlada cusub ee Federaalka ah, maamulada xubnaha ka ah dawladda
Federaalka, iyo dalalka daneeya arrimaha Soomaaliya si loo dardargaliyo
horumarinta la iskuguna raaco iskaashi heer caalami ah oo baahidiisu tahay in
Soomaaliya ay qaado dhabbaha ku jihaysan nabad buuxda iyo barwaaqo sanadka
2020.
Soomaaliya waxay u sii baahnaan doontaa taageero la taaban karo guud ahaan ammaanka,
isbadal siyaasadeed, horuminta dhaqaalaha iyo bulshada si loo sugo in la
adkeeyo horumarka ay sameysay shantii sano ee la soo dhaafay.
Warsaxadeedka waxaa lagu sheegay in xiligan oo kala bar dadka Soomaaliya
aanay haysan cunto la isku hallayn karo, shirku waa fursad lagu xoojiyo
jawaabta beesha caalamka ee abaarta jirta iyo baahida gargaarka
bini'aadamtinimo waxaa loo baahan yahay taageerada caalamiga ah si looga
hortago abaar baahsan, hadii aan taas la helinna horumarka siyaasadeed iyo
ammaan ee Soomaaliya laga sameeyey tan iyo 2012-kii wuxuu noqon doonaa mid dib
u dhac wajaho.
C/raxmaan Diini, Hiiraan Online
[email protected]
