Al-shabaab oo Bayaan ay soo saartay ku Shaacisay in Dhexdooda ay kasoo baxeen Kooxo kala dhantaalaya Midnimadooda
Axad, May 19, 2013 (HOL) — Xarakada Al-shabaab
ayaa bayaan ay soo saartay maanta waxay ku sheegtay inay gudahooda kasoo baxeen
kooxo ujeeddadoodu tahay inay kala dhantaalaan safka xoogaggooda dagaalka kula
jira dowladda Soomaaliya iyo ciidamada taageeraya.
Bayaankan oo lasoo dhigay baro Internet oo taageersan
Al-shabaab ayaa lagu sheegay in kooxahaas ay meel kaga dheceen hoggaanka sare ee Al-shabaab si
ay u kala dhantaalaan wadajirka Al-shabaab iyo awoodda xoogaggooda dagaallada ku jira.
“Muddooyinkii ugu dambeeyay waxaa aragnay
codka qaar ka mid ah fidno-wadayaasha oo sare u soo baxaya, kuwaasoo ummadda
khilaaf kala dhex-dhigaya si midnimadoodii loo waayo, meeshana uu ka baxo
wadajirkoodii, innagoo og in diinta Islaamku ay reebtay kala tagga iyo kala
furanka,” ayaa lagu yiri bayaanka Al-shabaab kasoo baxya.
Sidoo kale, bayaanka oo ku qornaa
luuqadda Carabiga ayaa lagu sheegay in ayaa lagu sheegay in Al-shabaab iyo
dagaalyahannada kale ee caalamka ka dagaalamaya ay ku taagan yihiin jidka saxda
ah ayna ummadahooda ugu adeegayaan adkeynta shareecada Islaamka, xaqiijinta
cadaaladda, ayna sii wadayaan dagaalka ay kula jiraan cadowgooda.
Qoraalka kasoo baxay Al-shabaab ayaa lagu
yiri: “Waxba yaan la dhaawicin kalsoonida aad ku qabtaan hoggaankiinna oo aan
ka leexan jidkii xaqa ahaa ee ay horay ugu taagnaayeen. Way sii wadayaan
naf-hurnimadooda way sii soconaysaa cadowgooduna wuu badanayaa. Sidii aad kaga
barateenna ma reebanayaan dadaal illaa ay calanka towxiidka ka gaarsiiyaan caalamka
oo dhan dibna loosoo celiyo khilaafadii Islaamka.”
Al-shabaab ayaa sidoo kale ku sheegtay
qoraalkeeda markii ay guul-darro ku dhamaadeen shirqoolladii dibadda laga soo
maleegayay in fidno abuur laga billaabay gudahooda si loo kala dhantaalo awoodda
xoogagga Al-shabaab.
Ugu dambeyn, bayaanka kasoo baxay Al-shabaab
ayaa lagu sheegay in lagu faafiyay warar been abuur ah qaar ka mid ah bogagga
Internet-ka, kuwaas oo ay ku sheegeen inay yihiin kuwo been abuur ah la doonayo
in lagu kala dhantaalo awoodda xoogagga Al-shabaab oo hadda maraysa meel aad
uga xoog badan sidii ay shalay ahayd.
Bayaanka laguma sheegin cidda iyo kooxda
ay Al-shabaab ula jeeddo inay ku howlan yihiin kala dhantaalidda awooddooda,
iyadoo la xusuuto in maalin ka hor ay warbaahintu baahisay cod uu soo duubay
Sheekh Xasan Daahir Aweys oo ka mid ah hoggaamiyeyaasha Al-shabaab, isagoo dhaleeceynaya
amiirka Al-shabaab, Axmed Cabdi Godane oo loo yaqaan Sheekh Mukhtaar C/raxmaan
Abuu-Zubeyr.
Sheekh Xasan Daahir ayaa codka lasoo dhigay
bar Internet ku sheegay in ciddii ka hortimaadda fikaradaha hoggaamiyaha
Al-shabaab Sheekh Abuu-Zubeyr ay noqonayso dambiile lana beegsanayo si loo
dilo.
Maxamed Xaaji Xuseen, Hiiraan Online
[email protected]
Muqdisho, Soomaaliya