3/29/2024
Today from Hiiraan Online:  _
Wararka Maanta- Jimco, May 11, 2012
Guddiga Xawaaladleyda Soomaalida ee Gobolka Minnosota oo ka Carooday Bankiga US Bank oo diiday inuu la shaqeeyo Xawaaladaha Soomaalida

Jimco, May 11, 2012 (HOL) — Guddiga xawaaladleyda Soomaalida gobolka Minnesota ee Mareykanka ayaa aad uga carooday bankiga US Bank oo sheegay inuusan diyaar u ahayn inuu la shaqeeyo xawaaladleyda Soomaalida, kaddib wada-xaajood muddo socday oo bankigaas uu kula jiray guddiga xawaaladleyda Soomaalida.

C/raxmaan Maxamuud Muuse oo ka mid ah guddiga xawaaladleyda Soomaalida ee wadahadalka kula jiray US Bank oo u warrramayay VOA-da aya sheegay in bankigu uu shalay qoraal u soo gudbiyay, kaasoo uu ugu sheegay inuusan la shaqeyn karin xawaaladaha Soomaalida.

"Bankiga US Bank waxaan wadahadallo kula jirnay muddo dheer, balse nasiib-darro wuxuu shalay noosoo diray fariin uu noogu sheegayo inuusan nala shaqeyn karin," ayuu yiri C/raxmaan Muuse oo intaas ku daray inay maanta sameynayaan dibadbax ay ku muujinayaan sida ay go'aankaas uga xun yihiin.

Sidoo kale, mas'uulkan wuxuu sheegay in xawaaladaha Soomaalidu ay lacagaha ka diri jireen Siattle-Washington balse bankiyadii halkaas ku yaallay ay iyaguna sheegeen in wixii bishan ka dambeeya aysan doonayn inay lasii shaqeeyaan xawaaladaha Soomaalida.

"Waxaanu doonaynaa inaan maanta xirno dhammaan akoonnada aan ku leennahay bankiyada US Bank si aan uga jawaabno go'aankiisa isla markaana aan u saarno cadaadis dhanka dhaqaalaha ah," ayuu mar kale yiri C/raxmaan Muuse.

Gobolka Minnesota ee dalka Mareykanka ayaa waxaa ku nool Soomaali fara badan oo tan iyo billowgii sannadkan la'aa goob ay u mariyaan ehelladooda Soomaaliya ku nool biilashii ay ku nool lahaayeen, kaddib markii Franklin Bank uu xiray akoonkii ay xawaaladaha Soomaalidu lacagta marin jireen.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
5/11/2012 1:59 PM EST
Jimco, May 11, 2012(HOL): Ra’iisul Wasaaraha Soomaaliya Dr.Cabdiweli Maxamed Cali Gaas ayaa maanta kulan la qaatay Saraakiil ka tirsan Qaramada Midoobey, iyadoona kulanka looga hadlayay heshiis is-afgarad ah (MOU) oo ay kala saxiixdeen dowladda Soomaaliya iyo hay’adda u qaabilsan Qaramada Midoobey Xuquuqul Insaanka.

5/11/2012 8:28 AM EST
Jimco, May 11, 2012(HOL): Jaaliyadda Somaliland ee magaalada Malmö ee dalka Sweden ayaa maanta la gudoonsiiyey shahaado uu bixiyo aqalka Boqortooyada ee dalkan Sweden. Shahaadadan oo ah markii ugu horeysay ee Taariikhda dalkan Sweden ay ku guuleystaan dad Soomaali ah ayaa waxaa maanta (shalay) guddoonsiiyey Badhasaabka gobolka Skåne Mr: Göran Tunhammar iyadoo ay halkaas goob joog ka ahaayeen madaxada Gobolkan & Madaxda Jaaliyadda Somaliland ee Magaalada Malmö ee dalkan Sweden.

5/11/2012 4:27 AM EST
Jimco, May 11, 2012 (HOL) — Kooxo hubeysan ayaa dagaal kala hortagay ciidammo ka tirsan kuwa dowladda KMG ah oo saakay isku dayay inay fujiyaan goobo ganacsi oo laga dhistay hareeraha isgoyska Banaadir ee magaalada Muqdisho, iyadoo taasi ay keentay in isgoyskaas uu xirmo.

5/11/2012 4:22 AM EST
Jimco, May 11, 2012 (HOL) — Sarkaal ka tirsan ciidamada DKMG ah ayaa ku dhintay dagaal ciidammo kawada tirsan dowladd KMG ah ku dhexmarya xaafadda Suuq-Bacaad ee degmada Yaaqshiid, iyadoo guddoomiyaha degmada Huriwaa uu eedeyn u jeediyay ciidamada dowladda KMG ah iyo kuwa AMISOM.

5/11/2012 3:52 AM EST
Jimco, May 11, 2012 (HOL) — Guddoomiyihii baarlamaanka Soomaaliya xildhibaan Sheekh Aadan Maxamed Nuur (Sheekh Aadan Madoobe) oo ku sugan degmada Xudur ayaa sheegay inay baaritaan ku sameynayaan dad shacab ah oo lagu dilay deegaan ku dhow degmada Xudur.

5/11/2012 3:41 AM EST
Jimco, May 11, 2012 (HOL) — Guddoomiyaha majmaca culumada Soomaaliyeed, Sheekh Axmed Dhicisow ayaa sheegay inay dib u dhigeen qabashada mudaaharaad ay ku wadeen inay maanta ka dhigaan Muqdisho, kasaoo ay uga soo horjeedaan dastuurka cusub ee Soomaaliya.

5/11/2012 3:35 AM EST
Jimco, May 11, 2012 (HOL) — Kooxo bastoolado ku hubeysan ayaa toogasho ku dilay laba qof, kuwaasoo warar kala duwan ay kasoo baxayaan, waxaana kooxihii dilka geystay u suurogashay inay ka baxsadeen goobtii ay dilka ka geysteen.