8/13/2020
Today from Hiiraan Online:  _
Wararka Maanta- Arbaco, July 25, 2012
Al-shabaab oo ku hanjabtay inay beegsan doonto xubnaha ka qaybgalaya shirka lagu ansixinayo Dastuurka ee Muqdisho ka furmay


Arbaco, July 25, 2012 (HOL) — Xarakada Al-Shabaab oo dagaal kula jirta dowladda KMG ah iyo AMISOM ayaa ku goodisay inay beegsan doonto odayaasha iyo ergada uu Muqdisho uga furmay shirka lagu ansixinayo dastuurka qabyada ah ee Somalia.

Guddoomiyaha gobolka Banaadir ee Xarakada Al-shabaab, Sheekh Maxamed Xasan Cumar (Abuu-C/raxmaan ) oo ayaa sheegay inay la socdaan shirka Odayaasha uga socda Muqdisho, isagoo odayaasha ku tilmaamay kuwo calooshood u shaqeystayaal ah oo aanay jirin cid ay matalaan.

"Waan la soconnaa arrimaha dastuurka ay gaaladu wadato, waxaan ogsoonnahay in gaaladu ay soo diyaarsadeen odayaal lagu magacaabay dhaqan, muddo ayay shirar u hayeen, cadawga Alle wuxuu doonayaa in sunnada Nebiga (NNKH) iyo kitaabka Qur'aan meesha laga saaro, taasina ma dhacayso," ayuu yiri Sheekh Abuu-C/raxmaan.

Wakiilku wuxuu sidoo kale sheegay in odayaasha dhaqanka ay ku qasban yihiin inay dastuurka ansixiyaan, isagoo wax lala yaabo ku tilmaamay in odayaasha qaarkood ay kasoo horjeesteen qodobbada dastuurka ka midka ah.

"Odayaashu waxay ku qasban yihiin inay raacaan waxa loo yeeriyo, lagama baryayo inay ansixiyaan dastuurka, waayo lacag ayay ku cuneen, waana laga dhalaalinayaa, odayaasha walwalka muujinaya ee dhahaya dastuurka waxbaa ku jira inay ku qasban yihiin ansixintiisa ha ogaadeen," ayuu yiri guddoomiyaha gobolka Banaadir ee Al-shabaab.

Xarakada Al-shabaab ayaa sannadkii hore isaga baxday degmooyin ay Muqdisho kaga sugnaayeen, kaddib markii culeysyo milateri ay dareemeen, iyadoo sidoo kale ay ciidamada AMISOM iyo kuwa DKMG ah ka qabsadeen bilihii lasoo dhaafay degmooyinka Balcad iyo Afgooye oo dhinacyada ka xiga Muqdisho.

Ugu dambeyn, Sheekh Abuu-C/raxmaan wuxuu sheegay inay Muqdisho ka fuliyeen howgallo qorsheysan, kuwaasoo ay ku bartilmaameedsadeen ciidamada kala duwan ee dowladda KMG ah iyo fariisimaha AMISOM.

Maxamed Xaaji Xuseen, Hiiraan Online
[email protected]
Muqdisho, Soomaaliya










Click here
7/25/2012 3:21 PM EST
Columbus, Ohio (HOL) Gudoomiyaha Gudiga badbaadinta Geeska Afrika Muuse Cabdi Faarax ayaa maalintii Khamiista ee bishan July 19keedii magaalada Washington kula kulmay Madaxweyne-ku-xigeenka dalka Mareyknaka Mudane Joe Biden.

7/25/2012 9:47 AM EST
Arbaco, July 25, 2012 (HOL) — Shirka ansixinta dastuurka ee maanta ka furmay Muqdisho ayaa waxaa hadallo kala duwan ka jeediyay madaxda dowladda KMG ah ee Soomaaliya, waxaana mas'uuliyiintii hadlay oo dhan ay ku tilmaameen guul la gaaray.

7/25/2012 8:38 AM EST
Arbaco, July 25, 2012 (HOL) — Ciidamada Itoobiya ee ku sugan degmada Baydhabo ee xarunta gobolka Bay ayaa xabsiga dhigay maanta taliyihii ciidamada booliiska degmada Baydhabo, Aadan Biid iyo taliyaha ciidamada booliiska DKMG ee gobollada Bay iyo Bakool, Aadan Doodishe.

7/25/2012 8:36 AM EST
Arbaco, July 25, 2012 (HOL) — Golaha ammaanka ee Qaramada Midoobay ayaa si kooban uga dooday xalay oo Talaado ahayd warbixin ay soo diyaariyeen guddiga la socodka cunno-qabateynta hubka ee Soomaaliya iyo Eritrea, taasoo ku eedeysay madaxda dowladda KMG ah inay lunsadeen dhaqaale loogu deeqay Soomaaliya.

7/25/2012 8:35 AM EST
Arbaco, July 25, 2012 (HOL) — Afartaneeye guri oo ku yaalla magaalada Hargeysa ayaa khasaare ka soo gaadhay Roobab Dabaylo watay oo shalay galab ilaa xalay ka da’ayey magaaladda iyo agagaarkeedda, kuwaas oo guryo badan jiingaddii sare ka qaaday.

7/25/2012 4:33 AM EST
Arbaco, July 25, 2012 (HOL) — Waxaa goor dhaweyd si rasmi ah uga furmay magaalada Muqdisho shirka ansixinta dastuurka qabyada ah ee Soomaaliya, iyadoo la adkeeyay ammaanka guud ee halka uu shirku ka furmayo iyo wadooyinka Muqdihso qaarkood.