Hiiraan Online

Sabti, Oktoobar 06, 2012 (HOL) — Askari ka tirsan ciidamada maamulka gobollka Hiiraan ayaa geeriyooday mid kalana dhaawac ayaa soo gaaray kadib markii uu rasaas ku furay mid ka mid ah ciidamada dowladda Itoobiya ee ku sugan magaalada Baladweyne.

Illaa iyo hadda si dhab looga oga sababta rasmiga ah ee keentay in askariga ka tirsan ciidamada Itoobiya rasaasta ku furo ciidamada ka tirsan maamulka gobollka Hiiraan, inkastoo ay jiraan warar sheegaya in uu kala shaki soo kala dhax-galay labada dhinac.

Ma jiro ilaa iyo waqtigan wax war ah oo ay mas’uuliyiinta maamulka gobollka Hiiraan ka soo saareen dilka askariga ciidamada Itoobiya uu u geystay askariga kale ee ka tirsanaa ciidamada maamulka gobollka.

Subax kasta marka uu waabarayo waxaa howlgal lagu sugayo amniga ka sameeya bartamaha magaalada Baladweyne ciidamada Itoobiya iyo kuwa maamulka gobollka Hiiraan oo iskaashanaya, waxaana uu falkani noqonayaa kii ugu horeeyay oo si toos ah uga dhax dhaca labada dhinac.

C/raxmaan Diini, Hiiraan Online
[email protected]
Baladweyne, Soomaaliya