7/13/2020
Today from Hiiraan Online:  _
Wararka Maanta- Khamiis, July 26, 2012
Ciidamada AMISOM oo lagu wado inay dhammaadka bishan si rasmi ah ula wareegaan sugidda ammaanka Baydhabo


Khamiis, July 26, 2012 (HOL) — Ciidamada AMISOM ee ku sugna Baydhabo oo 100 askari ka kooban ayaa waxay isku diyaarinayaan inay la wareegaan sugidda amniga degmada Baydhabo ee gobolka Bay, halkaasoo ay tageen bishii Abriil ee sannadkan.

Gaadiid gaashaaman ee ay wataan ciidamada AMISOM ayaa maalin walba si joogto ah loogu arkaa iyagoo dhexmaraya bartamaha Baydhabo, iyadoo saraakiil ka socda AMISOM ay iyaguna booqashooyin ku tagaan degmadaas.

"Maalin walba ayaan ku aragnaa gudaha degmada ciidamada AMISOM oo socod ku maraya, balse weli waxaa jooga ciidamada Itoobiya kuwaasoo mararka qaarkood roondooyin ku sameeyay gudaha degmada," ayuu yiri goobjooge ku sugan Baydhabo.

Ciidamada AMISOM ee ku sugan Baydhabo ayaa waxay ka kala socdaan dalalka Burundi iyo Uganda, waxayna degmadaas ahayd halkii ugu horreysay oo la geeyo ciidammo ka socda Midowga Afrika tan iyo markii ay howgalkooda nabad ilaalineed ka billaabeen magaalada Muqdisho.

Mas'uuliyiin ka tirsan dowladda KMG ah oo ku sugan degmada Baydhabo ayaa laga soo xigtay in ciidamada AMISOM ay la wareegi doonaan ammaanka Baydhabo dhammaadka bishan July oo ay maalmo ka harsan yihiin.

Sidoo kale, ciidamada AMISOM ayaa waxaa la geeyay degmada Baladweyne oo ka mid ah degmooyinkii Al-shabaab laga qabsaday lix bilood ka hor, waxaana ciidanka la geeyay halkaas ay ka socdaan dalka Jabuuti.

Dhanka kale, waxaa maalintii labaad xabsiga Baydhabo ku jira taliyihii qaybta booliiska ee gobolka Bay iyo taliyaha saldhigga Baydhabo, kuwaasoo lagu eedeeyay inay fududeeyeen falal ammaan-darro oo magaaladaas ka dhacay.

Maxamed Xaaji Xuseen, Hiiraan Online
[email protected]
Muqdisho, Soomaaliya








Click here
7/26/2012 10:27 AM EST
Khamiis, July 26, 2012-Wasaaradda caafimaadka ee Puntland ayaa soo saartay amar si kumeel gaar ah shaqada looga joojinayo shaqaalaha ajaanibta ah ee ka howlgala goobaha caafimaadka ee gaarka loo leeyahay.

7/26/2012 8:32 AM EST
Khamiis, July 26, 2012 (HOL) — Waxaa magaalada Muqdisho maanta oo Khamiis ah ka dhacay dibadbax lagu dalbanayo in xilliga KMG ah lasoo gabgabeeyo 20-ka bisha Ogoosto ee soo sannadkan iyo in la qabto doorasho xor ah oo xalaal ah.

7/26/2012 7:55 AM EST
Khamiis, July 26, 2012 (HOL) — Labaddii sano ee u dambeeyey ayaa dadweynaha Somaliland ku baraarugeen inay iskood u samaystaan wadooyinka deegaanadoodda, si ay horumarka, ganacsiga iyo isku xidhnaanta magaalooyinkoodu u fududaato.

7/26/2012 7:27 AM EST
Khamiis, July 26, 2012 (HOL) — Wareegto kasoo baxday xafiiska madaxweynaha DKMG ah ee Soomaaliya oo ku taariikheysnayd 23-kii bishan oo aan weli saxaafadda loosoo bandhigin ayaa lagu sheegay in gobolka Hiiraan loo qaybiyay laba gobol oo lagu kala ah: gobolka Hiiraan iyo gobolka Shabeellada sare.

7/26/2012 6:56 AM EST
Khamiis, July 26, 2012 (HOL) — Wasiirka arrimaha Afrika ee Birtain, Henry Bellingham ayaa soo dhaweeyay warbixinta kooxda la-socodka arrimaha Soomaaliya iyo Eritrea ay kasoo saareen Soomaaliya, isagoo carrabka ku adkeeyey baahida looga qabo in horumar dheeri ah laga sameeyo kor-u-qaadista daah-furnaanta Soomaaliya iyo in la hubiyo in Ku-meel-gaarnimada lagu soo gebagebeeyo waqtigii loogu talo-galay.

7/26/2012 5:04 AM EST
Khamiis, July 26, 2012 (HOL) — Deegaanka Beergadiid oo qiyaastii 48km u jira magaalada Baladweyne oo xarunta gobolka Hiiraan ayaa la dhagax-dhigay markii ugu horeysay Isbitaal ay yeelanayaan bulshada ku dhaqan deegaannkaas oo dhibaato xoog leh ku qaba dhinaca adeega caafimaadka.

7/26/2012 5:04 AM EST
Khamiis, July 26, 2012 (HOL) — Golaha ammaanka ee Qaramada Midoobay ayaa soo dhaweeyay shirweynaha ansixinta dastuurka ee shalay oo Arbaco ahayd ka furmay Muqdisho, iyagoo ku goodiyay inay tallaabo ka qaadi doonaan shaqsiyaadka caqabadda ku ah nabadda, ammaanka iyo deggenahaashaha Soomaaliya, xitaa haddii laga gudbo xilliga KMG ah.

7/26/2012 5:02 AM EST
Khamiis, July 26, 2012 (HOL) — Shirweynihii ansixinta dastuurka qabyada ah ee Soomaaliya ayaa maalintii labaad galay iyadoo ergadu ay ka doodayso qodobbada dastuurka, inkastoo aysan awood u lahayn inay wax ka bedel ku sameeyaan.