Dagaal culus oo degmada Xudur ee Gobolka Bakool ku dhexmarya Ciidamada DKMG ah, kuwa Itoobiya iyo Al-shabaab
Isniin, Ogoosto 06, 2012(HOL) — Dagaalkan oo ahaa mid culus ayaa waxaa ku dhintay in ka badan 10-qof oo labadii dhinac ee dagaalamay ka mid ah, iyadoo la sheegay in tiro intaas ka badan ay ku dhaawacmeen.
Xoogag taageersan Al-shabaab oo weerar ku qaaday degmadaas oo ay ka taliyaan ciidamada DKMG ah iyo kuwa Itoobiya ee garabka siinaya ayaa isku bedel dagaal culus oo khasaare badan dhaliyay.
"Ciidammo taabacsan Al-shabaab ayaa gudaha u soo galay qaar ka mid ah xaafadaha degmada Xudur, wuxuuna dagaalku ka socday muddo saacado ah," ayuu yiri goobjooge ku sugan degmada Xudur oo warbaahinta la hadlay.
Goobjoogaha ayaa sheegay in dagaalku uu shalay gallinkii dambe ka billowday meel duleedka ka ah degmada Xudur oo ay ku yaalleen saldhigyo ay ciidamada DKMG ah iyo kuwa Itoobiya lahaayeen, balse uu xalay la isla soo galay gudaha degmada.
Saraakiil u hadlay Al-shabaab ayaa sheegay inay ka gaareen dagaalkaas ujeedkii ay ka lahaayeen ayna ciidamadooda dib ugu laabteen fariisimihii ay markii hore kasoo duuleen oo ku yaalla meel ku dhow degmada Xudur.
Mas'uuliyiinta dowladda KMG ah ee ku sugan gobolka Bakool ayaa sheegay inay iska caabiyeen dagaalka, iyagoo intaas ku daray inay khasaare badan gaarsiiyeen xoogaggii Al-shabaab ee degmadaas weeraray.
Illaa hadda ma jiro dhinac sheegay khasaaraha kasoo gaaray dagaalka, wuxuuna ka mid noqonayaa dagaalkan weerarro ay tan iyo billowgii bishan Ramadaan ka wadday Al-shabaab degmooyin iyo deegaanno ku yaalla gobollada Koonfureed ee Soomaaliya.
Maxamed Xaaji Xuseen, Hiiraan Online
[email protected]
Muqdisho, Soomaaliya
