Banaanbax looga soo horjeedo keenista ciidamo ka socda IGAD ee dalka Soomaaliya oo Muqdisho ka dhacay

Isniin, February 14, 2005 (HOL) @16:00GMT: Banaanbax aad u ballaaran oo ay soo qabanqaabiyeen Dhaqaaqa Bulshada Rayidka iyo mas'uuliyiinta Gobolka Banaadir, isla markaana ka dhacay Fagaaraha Tareebuunka ee magaalada Muqdisho ayaa looga soo horjeeday in ciidamo ka socda dalalka IGAD la geeyo dalka Soomaaliya, iyadoo si gaar ahna farta loogu fiiqay Dowladda Itoobiya.

Banaanbaxan ayay si aad ah u soo camireen ardayda Dugsiyada Gobolka Banaadir, kuwaasi oo ku dhawaaqayay ereyo dhan ka ah ciidamo shisheeye oo dalka la keeno, waxaana fagaaraha Tareebuunka ugu qudbeeyay dadkii isugu soo baxay Tareebuunka mas'uuliyiin ay ka mid ahaayeen Afhayeenka dhaqaaqa Bulshada Md. C/llaahi Maxamed Shirwac iyo Guddoomiyaha Gobolka Banaadir Md. C/llaahi Xasan Ganey Firimbi, kuwaasi oo caddeeyay sida aysan raali uga ahayn in ciidamo ka yimaada dalalka IGAD la geeyo Soomaaliya, inkastoo ay xuseen in aysan diidaneyn ciidamo kale oo yimaada.

Md. Shirwac waxaa uu sheegay in ay shacabka Soomaaliyeed taageersan yihiin dowladda lagu soo dhisay dalka Kenya, isla markaana ay soo dhaweynayaan madaxda dowladdaas, haddii ay ahaan lahaayeen Madaxweynaha, Guddoomiyaha Baarlamaanka iyo Ra'iisul Wasaaraha haseyeeshee ay diidan yihiin shacabku in ay dalka yimaadaan ciidamo ka socda dalalka IGAD oo ay hub ka dhigisna ka sameeyaan, una ilaaliyaan nabadgelyadiisa.

Ma ahan bannaanbixii ugu horeeyay ee looga soo horjeedo ciidamo dalka la keeno waxaa Jimcihii aynu ka soo gudubnay ka dhacay isla Fagaaraha Tareebuunka mid ay soo qabanqaabiyeen Mas'uuliyiinta Maxkamadaha Islaamiga ah ee Muqdisho, iyadoo bannaanbaxaasina uu ahaa mid dadka loogu baaqay in ay la jihaadaan haddii ay gebi ahaanba Ciidamo Shisheeye dalka yimaadaan.

Salaad Iidow Xasan (Xiis) Hiiraan Online
[email protected]
Mogadishu, Somalia

Maalinta Jaceylka Adduunka oo maanta Muqdisho laga xusay

Isniin, February 14, 2005 (HOL) @16:00GMT: Xaflad si heer sare ah loo soo agaasimay, isla markaana lagu maamuusayay maalinta Jaceylka Adduunka oo ku beegan 14-ka Febraayo ee sanad kasta ayaa maanta lagu qabtay Xarunta Dhalinyarada KANAVA ee magaalada Muqdisho.

Xafladdan oo ay ka soo qeybgaleen dhalinyaro aad u fara badan ayaa lagu soo bandhigay qiimaha uu jaceylka ku fadhiyo, iyadoo la sheegay in aysan noloshu dhadhan lahayn jaceyl la'aantiis, sidaas darteedna lamaanayaasha is-qaba iyo kuwa is-xod xodanaya ee doonaya in ay is-guursadaan loogu baaqay in aysan qiimo tirin jaceylka oo ay dhowraan.

Dhanka kalena waxaa xafladda loo sameeyay maalinta Jaceylka Adduunka (Valentin's Day) ee ka dhacday magaalada Muqdisho lagu soo beegay isla markaana lagu weyneeyay sanadguuradii koowaad ee ka soo wareegatay markii la aas aasay Urur u dooda Xuquuqda Jaceylka, kaasi oo uu Guddoomiye u yahay C/raxmaan Maxamed Xasan Xudeyfi oo ka tirsan Wariyayaasha Idaacadda Banaadir ee magaalada Muqdisho, wuxuuna Mr. C/raxmaan oo ka hadal kooban ka jeediyay xafladdaas uu ugu baaqay in la xaq dhowro Jaceylka oo markaasina aanan laga been abuuran, iyadoo ujeedku yahay in dano kale lagu gaaro.

Sidoo kalena, Guddoomiyaha Ururka Garoobada oo fadhigeedu yahay magaalada Muqdisho Marwo Xaliimo Cali Cente oo lagu casuumay xafladdan ayaa iyadana ku boorisay Lamaanayaasha is-qaba iyo kuwa aanan weli is-guursan in ay ka taxadaraan nolosha quruxda badan ee Lamaanaha, si bey tiri ay uga badbaadaan in ay dib ugu noqdaan nolol kali jiif ah iyagoo mid Lamaane ah mar u gudbay oo dhadhamiyay.

Haddaba, iyadoo ay maanta ku beegan tahay maalinta Jaceylka Adduunka, Bisha Febraayo-na ay tahay 14 ayaa waxaa qasri ku yaala waqooyiga magaalada Paris ee dalka France waxaa ka dhacday xaflad ay ka soo qeybgaleen marti sharaf gaareysa 250 ruux, kuwaasoo ka soo xaadiray maamuus ay jaceylkooda u sameeyeen lamaanayaasha kala ah Weeraryahanka kooxda Real Madrid ninka lagu magacaabo Ronaldo iyo gabadha ay isu cindanaayeen ee Daniella Cicarelli oo iyada qudheeda la sheegay in ay isku tahay Wariyad iyo Dhar Xayeesiiso (Model).

Dad qaarkiis ayaa waxay maalintan ku xusaan in ay ubaxyo iyo haddiyado kale isa siiyaan balse Ronaldo iyo gacalisadiisa Daniella waxay sameeyeen wax ka duwan, waxaa laga yaabaa in aad is-weydiiso waxaas waxa ay ahaayeen, wax kale ma ahayn kaliya waxay isku dhunkadeen 250 ruux oo marti u ahaa hortooda, iyadoo dadkaasina ay ku jireen asxaabtiisa kala ah Zinedine Zidane, Raul, David Beckham iyo Michael Schumacher oo ah Xiddig todobo jeer oo isku xigta ku guuleystay kaxeynta gaadiidka xawaaraha dheereeya lagu wado.

Ronaldo oo 28 jir ah iyo gacalisadiisa Daniella oo 23 jir ayaa ku dhawaaqay in ay is-guursanayaan dhamaadka sanadkan, iyadoo Ronaldo aysan u ahayn markii ugu horeysay oo uu guursado, waxayna horay u kala tageen gabar lagu magacaabo Milene Domingues, taasoo aan furiinkeeda sanad laga joogin, waxaana lagu waramay in Ronaldo uu sharciga u yaala dalka Spain oo uu ka ciyaaro u diiday in uu sanad gudahiisa labo guur sameeyo, taasina ay keentay in uu xafladdan ku dhigto dalka France.

Salaad Iidow Xasan (Xiis) Hiiraan Online
[email protected]
Mogadishu, Somalia

Guddoomiyaha Baarlamaanka Soomaaliyeed oo waxyaabihii uu Muqdisho ku soo arkay u gudbiyay Xildhibaanada Baarlamaanka

Isniin, February 14, 2005 (HOL) @16:00GMT: Guddoomiyaha Baarlamaanka Federaalka KMG ah ee Soomaaliya Md. Shariif Xasan Shiikh Aadan oo dhowaan magaalada Muqdisho safar ku yimid, isla markaana dib ugu laabtay magaalada Nairobi ayaa maanta wuxuu Xildhibaanada Baarlamaanka u gudbiyay waxyaabihii uu ku soo arkay magaalada Muqdisho.

Fadhigii maanta ay Xildhibaanada isugu yimaadeen oo ay ka soo xaadireen in ka badan 149 Mudane ayaa lagu aqriyay warbixin uu Guddoomiyaha ka soo diyaariyay safarkiisii Muqdisho, iyadoo warbixintaas oo dheereydna uu Guddoomiyaha baarlamaanka u wakiishay in uu ka aqriyo Xildhibaan Axmed Diiriye.

Inkastoo uu jiray guux hoose oo ay qabeen Xildhibaanada qaarkood oo ku saabsan in safarka Guddoomiyaha uu ahaa mid aan laga wada tashan, hadana warbixintii Xamar iyo dadka ku dhaqan laga diyaariyay waxay noqotay mid ay u sacab tumaan inta badan Xildhibaanada.

Guddoomiyaha Baarlamaanka oo ku xigeenadiisa kula jira guddoonka ay ku kala maqan yihiin dalalka Soomaaliya iyo Talyaaniga ayaa wuxuu u sheegay Xildhibaanada in ay Xamar kula soo kulmeen dad dowladnimo, nidaam iyo kala dambeyn doonaya, isagoo Xildhibaanadii ku doodayay in aanlaga tashan socdaalkiisii ku qanciyay in waxyaabihii dowladda loo dhisay ay ka mid ahayd in ay dalka ku laabato, isla markaana dhibaatada ka jirta ay wax ka qabato.'

Dhanka kalena, Guddoomiyaha Baarlamaanka ayaa la filayaa in uu caawa u baqoolo dalka Talyaaniga, halkaasoo uu ka heysto casuumaad ay u soo dirtay dowladda Talyaaniga, iyadoo Magaalada Rome-na ay uga sii horeeyaan wafdi kale oo uu hoggaaminayo guddoomiye ku xigeenka koowaad Prof. Maxamed Cumar Dalxa, waxaana la filayaa in uu guddoomiyaha dib ugu soo laabto magaalada Nairobi inta aysan dhamaanin bishan.

Salaad Iidow Xasan (Xiis) Hiiraan Online
[email protected]
Mogadishu, Somalia