Wasaarada Arrimaha Gudaha SL oo ka Hadlay Deegaanno Doorasho oo lagu Muransan yahay
Sabti, September 03, 2016
(HOL) — Wasaarada Arrimaha Gudaha Somaliland ayaa maanta wada-galay shir
saddex goosood ah oo ay isugu yimaadeen Gudigga Doorashada, Xisbiyada Qaranka iyo Wasiirka Arrimaha Gudaha, kaasi oo ay kaga arrinsanayaan lix
goobood oo ku yaalla waqooyiga Hargeysa oo goboladda qaarkood ku muransan
yihiin cidda ay raacayaan ama hoos tagayaan.
Lixdan goobood ayaa muran ka
dhex abuurtay beelaha wada dega ee waqooyiga ka dib markii ay isku qabsadeen
goboladda Maroodi jeex, Awdal iyo Saaxil oo gobol waliba ku doodayo deegaanka
ay raacayaan.
Sidoo kale, Lixdaan goobood
ayaa doorashooyinkii Somailand ka dhacay aanay doorasho ka dhicin, isla markaana la xayiray wakhtigii
dawladdii Daahir Rayaale Kaahin, kuwaas oo marna aan helin xaquuqdii ay wax ku
dooran lahaayeen ama lagu dooran lahaa, iyaddo wasaaradda arrimaha guduhuna ku
guul daraysatay inay gobol raaciso.
Hase yeeshee, wasaaradda
Arrimaha Gudaha ayaa sheegtay in lixdaasi goobood si madax banaan ah looga
samaynayo diiwaangelin, kuwaas oo codeyn doonna doorashadda madaxweynaha iyo
madaxweyne ku xigeenka, balse aan codeyn doonin doorashooyinka xildhibaanadda
golaha deegaanka iyo baarlamaanka, maadaama oo gobol-na wali aan la raacin.
Balse, go’aankan ka soo
baxay wasaaradda arrimaha gudaha waxa qaadacay xildhibaanadda baarlamaanka ee
gobolka Awdal ka soo jeedda oo ku doodaya in dadkii deegaanku ay hore iskaga
diiwaangeliyeen goboladda la dariska ah lixdan goobood, sidaas darteed ay aan
diiwaangelin ka dhicin Karin illaa gobolka Awdal la raacinayo.
Wasiirka Arrimaha gudaha
Farotoon ayaa ka hadlay ujeedadda uu daarnaa
shirkan saddex geesood ahaa ee ay
wada galeen wasaarada Arrimaha Gudaha, hogaanka saddexda xisbi qaranka iyo
guddida doorashooyinka .
Yaasiin Xaaji Maxamuud ayaa
sheegay sheegay in la isku afgartay in diiwaangelintu ka qabsoonto, isla
markaana amniga iyo nabadgalyadda deegaankaasi ay u xil saaran tahay sugideedda
wasaaradda Arrimaha Gudaha.
“Saaka waxa wasaarada
arrimaha gudaha ku qabsoomay shir ay ka qaybgaleen Wasaaradda arrimaha
gudaha, guddida doorashooyinka iyo asxaabta qaranka, wuxu ku saabsanaa arrinta
diiwaangelinta lixda goobood ee waqooyiga, arrinta iyada ah Af-garad wanaagsan
ayaa laga gaadhay, Waxaa la isla gartay in Arrintaasi ay leedahay Wasaaradda Arrimaha Gudaha iyo Guddiga Doorashooyinka oo u Xil-saaran Hawlaha
diiwaan-gelinta, si buuxda ayaa la iskula afgartay sidaas ayaana lagu soo
dhameeyay,” ayuu yiri Farotoon wasiirka arrimaha gudaha.
Isagoo intaas ku daray. “Waxaa
lagu soo dhameeyey in wasaaradda arrimaha guduhu sugto amniga oo si nabadgalyo
leh uga dhacdo diiwaangelintu, komishanku hawshoodda gutaan”.
Si kastaba ha ahaatee, lixdaan
goobood ayaa si weyn loogu muran yahay gobolka raacayaan, iyagoo dadka
deegaanka laftooddu ku kala duwan yihiin, haseyeeshee, muddo dheer ka dib waa
markii ugu horeysay ee deegaankaasi diiwaangelin ka dhacdo.
Barkhad-ladiif M. Cumar,
Hiiraan Online
[email protected]
Hargeysa, Somaliland