Beesha Caalamka: Waxaan bixinay inta badan Dhaqaalaha Doorashooyinka Somalia ku baxaya
Sabti, September 03, 2016
(HOL) — Beesha Caalamka ayaa sheegtay inay bixisay qarashkii ay ugu Talo-galeen
Doorashooyinka lagu wado in ay Dalka Ka dhacaan Sannadkan lagu jiro
daba-yaaqadiisa.
Warbixin ay si Wadajir ah u soo Saareen; QM, Midowga Afrika, Midowga Yurub, IGAD, Boqortooyada UK, Mareykanka,
Sweden iyo Talyaaniga, ayaa lagu sheegay inay bixiyeen dhaqaalihii doorashooyinka
Somalia 60%, si loo sii wado hawlaha la xiriira doorashooyinka.
Qoraalkan kasoo baxay Beesha
Caalamka ayaa lagu xusay inay muhiim tahay in hore loo sii wado qorshayaasha
doorashooyinka dalka, isla markaana aan lagu mashquulin waxyaabaha dib u dhac
ku keeni kara Doorashooyinka soo socda.
Sidoo kale, Madaxda Dowladda
Federaalka Soomaaliya, ayaa iyagana loogu baaqay inay ilaaliyaan waqtiga doorashada,
iyadoo lagula taliyay in Doorashada Aqalka sare iyo kan hoose ee baarlamaanka
iyo doorashada Madaxweynaha ay ku dhacdo xiligii loo qabtay.
“Innagu waxaan qabnaa inay
muhiim tahay in shaqada doorashooyinka billowdaan si ay ugu dhacaan xilligii
loo qoondeeyay,” ayuu warbixinta ku yiri Ergayga QM ee Somalia, Michael
Keating.
Dhanka kale, Danjire Keating
ayaa sheegay in Somalia ay galayso marxalado kala guur ah, Sidaas awgeedna, waxaa
loo baahan yahay buu yiri in si wadajir ah looga wada qayb-qaado hawlaha Doorashooyinka
Somalia.
Ugu dambeyn, Dowladda
Federaalka Somalia iyo Beesha Caalamka ayaa horay isugu hayay dhaqaalaha ku baxayay Doorashooyinka
la filayo in Dabayaaqada Sannadkan 2016-ka dalka ka dhacaan, Waxaana Mas’uuliyiinta
Dowladda Somalia ay codsatay inay Beesha Caalamka bixiso Dhamaan dhaqaalaha ku
baxaya Doorashooyinka.
Maxamed X. Xuseen, Hiiraan Online
[email protected]
Muqdisho, Soomaaliya