Xaflad lagu soo dhaweynayay Duqa Boosaaso oo lagu Qabtay Gobolka Arizona, USA (SAWIRRO)
Sabti, September 03, 2016
(HOL) — Munaasabad lagu soo dhaweynayay Duqa Magaalada Boosaaso, ayaa ka dhacday
Gobalka Arizona ee Mareykanka, Waxaana Munaasabaddan ka qayb-galay mas'uuliyiin ka
kala socday Qaybaha kala duwan ee bulshada gobalka Arizona iyo xubno ka socotay
Uruurada Bulshada.
Xafladdan ayaa waxaa dhanka
kale Goob-joog ka ahaa (Somalia American United council), waxaa lagu soo
beegay socdaallo fara badan oo uu Duqa Bosaaso,
yaasiin Mire Maxmed uu ku marayay waayihii dambe dalka Mareykanka, taasoo la
xiriirta mataaneynta Boosaaso iyo Minneapolis oo dhawantan Gobolka Minnesota
ka dhacday.
Ugu horreyntii, Waxaa hadallo
ka jeediyay Munaasabaddan Mas'uuliyiin sare oo ay ka mid ahayeen; Jen. Maxamed
Cali Sharman sarkaal hore oo ka tirsanaa ciidankii Cirka Dowladdii Dhaxe ee Somalia
iyo Prof, Maxamed Abuukar Cali - oo ahaa Madaxii Mashruuca Beeraha Dowladdii Dhaxe ee Soomaaliya, ahna Guddoomiyaha Jaaliyadda Soomaaliyeed ee Somali American
United council.
“Mudanayaal iyo marwooyin, salaan kaddib, waxaan
rabaa inaan soo dhaweeyo maayarka Boosaaso, Yaasiin Mire iyo wafdigiisa,
waxaana farxad noo ah in caawa aan halkan kusoo dhaweyneyno mas'uuliyiinta ka
socda dalkii Hooyo sida ay naga mudan yahiin haddii aan nahay Jaaliyadda Soomaaliyeed
ee Arizona waxaa nalagu yaqaan soo dhaweynta iyo bogadinta madaxda Dalka marka
ay nasoo booqdaan,” ayuu yiri Prof. Maxamed Abuukar.
Sidoo kale, Waxaa hadalka
qaatay Madaxadii Qaban-qaabadda xafladdaan soo dhaweynta ahayd oo ugu mahad-celilyay
Jaaliyadda Soomaaliyeed ee Arizona sida Mas’uuliyadda leh ee loosoo qaban-qabiyay
munasaabadda.
Duqa Boosaaso, Yaasiin Mire oo
ka hadlay xafladdaan lagu soo dhaweyay, ayaa Jaaliyadda Soomaaliyeed uga
warbixiyay socdalka uu ku joogo Dalka Mareykanka iyo Xaaladda dalka uu ku sugan
yahay.
Ugu dambeyn, Yaasiir Mire
ayaa xusay in dalku uu ku jiro marxalado kala duwan kuwaasoo ay sababeen dagaalladii
sokeeye iyo xaladaha bini'adamnimo ee ka jirta dalka, balse waxaan la dagaalameynaa
Gaajada, Shaqo la’aanta Dhallinyarada iyo Argaxgaxisada oo duullaan ku ah Qaybaha
kala duwan ee dalkeennu uu ka kooban yahay. Isagoo Qurbo-joogta ugu baaqay inay
ka qayb-qaadato xasilinta Somalia.
Abdulrahman D. Nur
[email protected]
Phoenix, Gobolka Arizona