SIYAASIGA CALI MAHDI MAXAMED OO SOO JEEDIYAY IN CIIDAMO SHISHEEYE DALKA LA KEENO

CALI MAHDI: “Dowlad waxay dowlad ku tahay in ay dadka ka awood badan tahay oo ay ciidan leedahay, dowladdii aan anigu madaxda ka ahaa ee 1991-kii waxay ka shaqeyn weyday ciidan la’aan, tii C/qaasim ee 2000 la soo dhisayna sidoo kale”

Talaado, February 08, 2005 (HOL) @ 19:00GMT: Siyaasiga Cali Mahdi Maxamed Maxamed oo maanta ka hadlayay kulan uu la yeeshay Guddoomiyaha Baarlamaanka Soomaaliyeed Md. Shariif Xasan Shiikh Aadan ayaa talo ku soo jeediyay in dowladda Soomaaliyeed ay adeegsato ciidamo shisheeye oo hub ka dhigis sameeya, nidaamkii iyo kala dambeyntiina soo celiya.

“Dowlad waxay dowlad ku tahay in ay dadka ka awood badan tahay oo ay ciidan leedahay, dowladdii aan anigu madaxda ka ahaa ee 1991-kii waxay ka shaqeyn weyday ciidan la’aan Tii C/qaasim ee 2000 la soo dhisayna sidoo kale, dowlad uu shacabkii ka awood badan yahay anigu ma qabo in ay wax qaban karto” ayuu yiri Cali Mahdi Maxamed oo caddeeyay in hadalkiisaas uu yahay talo soo jeedin go’aankana uu leeyahay Baarlamaanka Federaalka Soomaaliyeed.

Cali Mahdi waxaa uu sheegay in dowlad aan ciidan iyo awood looga cabsado lahayn in aysan ka hor shaqeyn karin shacab hubkii gacanta ugu jiro, sidaas darteed ayuu mar kale soo jeediyay in ay lagama maarmaan tahay in la helo ciidamo hub ka dhigis sameeya oo dowladdana dowlad ka dhiga, isagoo meesha ka saaray in ciidamadaas lagu soo daro kuwa dalalka safka hore ee Soomaaliya la deriska ah.

Cali Mahdi waxaa kale oo uu ka digay in caasimadda laga wareejiyo Muqdisho, isla markaana loo wareejiyo magaalooyin kale oo dowladdana ay taasi ku kalifto in ay magaalooyin si gooni gooni u kala degto, isagoo ku talo bixiyay in aan la faragelin caasimadnimada Muqdisho oo sideeda loo daayo.

Wafdiga Dowladda Federaalka ah ee maalmahaan Muqdisho ku sugan ayaa iyagu waxay afkooda ka dhowrayaan in ay yiraahdaan dowladdu waxay adeegsaneysaa ciidamo shisheeye, wuxuuna Guddoomiyaha Baarlamaanka shalay ka hor sheegay ciidamada Qalabka sida ee Soomaaliyeed in ciidamada dowladda ay noqonayaan Ciidamada Soomaaliyeed, waase haddii buu yiri ay ka dhabeynayaan ballanqaad ay soo jeediyeen ciidamada oo ah in ay dowladda la shaqeynayaan, inakstoo uu mar carrabka ku dhuftay in haddii ay ciidamada ballankaas ka baxaan ay qasab noqoneyso in dowladda ciidamo ajnabi ah adeegsato.

Horay waxaa u diiday in ciidamo Shisheeye dalka la keeno inta badan Siyaasiyiinta Muqdisho ee galay Xukuumadda iyo Baarlamaanka Federaalka ah iyo weliba Ra’iisul Wasaare Geedi, iyadoo ay dhamaan mas’uuliyiintaas sheegeen in ciidamada dowladda ay noqonayaan kuwo Soomaaliyeed, isla markaana kharashka lagu bixin lahaa Askar Shisheeye lagu maalgelin doono kuwa Soomaaliyeed. Sidoo kalena, waxaa iyana horay u diiday in ciidamo shisheeye dalka la keeno mas’uuliyiinta Maxkamadaha Islaamiga ah ee Muqdisho iyo weliba Dalladda Culumaa’udiinka Soomaaliyeed.

Salaad Iidow Xasan (Xiis) Hiiraan Online
[email protected]
Mogadishu, Somalia

Guddoomiyaha Baarlamaanka oo sheegay in la helay Furihii Nabadda iyo Qarannimada Soomaaliya

Talaado, February 08, 2005 (HOL) @ 19:00GMT: Waxay ahayd soo dhaweyn si aad ah loo soo qaabeeyay oo ay soo diyaariyeen Taageerayaasha Ra’iisul wasaare ku xigeenka Xukuumadda Federaalka ah ee Soomaaliya Inj. Xuseen Maxamed Caydiid, kaasi oo taageerayaashiisa ku sugan magaalada Muqdisho u soo faray farrin ah in ay soo dhaweeyaan wafdiga uu hoggaaminayo Guddoomiyaha Baarlamaanka Md. Shariif Xasan.

Dadweyne aad u fara badan oo luxayay caleemo qoyan ayaa waxay ku soo aruureen Xarunta Villa Somalia, si ay u soo dhaweeyaan guddoomiyaha baarlamaanka, una arkaan wafdiga dowladda cusub ee Soomaaliya, iyadoo sidoo kalena ay Xarunta Madaxtooyada ka daarnaayeen heeso lagu soo dhaweynayay Guddoomiyaha Baarlamaanka iyo Wafdigiisa, “Marti maahid Mudanow, Hoo Midigta Mudanow, meesha aad joogtaan minankiini weeyaan” iyo ereyo kale ayaa waxay ku jireen heeso ay soo tebinayeen cod baahiyayaal lagu xiray Xarunta Villa Somalia.

Guddoomiyaha Baarlamaanka Federaalka KMG ah ee Soomaaliya Md. Shariif Xasan Shiikh Aadan iyo wafdi ballaaran oo uu hoggaaminayay ayaa markaasi kadib waxay booqasho ku tageen xarunta Villa Somalia, isagoo maantana soo arkay halkii uu fariisan jiray Madaxweynihii Soomaaliya Marxuum Maxamed Siyaad Barre, halkaasoo si wanaagsan loo daryeelayay mudadii bur burka, inkastoo sanadihii sagaashamaadkii uu ku howlgelayay Marxuum Maxamed Faarax Caydiid.

Guddoomiyaha Baarlamaanka waxaa ku soo dhaweeyay Madaxtooyadii Soomaaliya ku simaha Guddoomiyaha Isbaheysiga SNA Md. Abuukar Cusmaan Shiikh (Ganey) oo isagu sheegay in Isbaheysiga SNA uu mar walba diyaar u yahay in uu soo dhaweeyo dowladda Soomaaliyeed, Isbaheysigoodana uu ku caan baxay xaq u dirirka, midnimada iyo dhowrista Qarannimada Soomaaliyeed.

Guddoomiyaha Baarlamaanka ayaa isaguna halkaas ka jeediyay hadal aan wax sidaas ah ka duwaneyn mid uu jeedinayay tan iyo intii uu dalka dib ugu soo laabtay, gaar ahaan markii uu shalay la hadlayay Ciidamada Qalabka sida ee Soomaaliyeed, wuxuuna Guddoomiyaha Baarlamaanka mar kale ka codsaday shacabka Soomaaliyeed in ay is-cafiyaan oo ay Allaah u towbad keenaan hubkana iska dhigaan, “wax bani’aadan sameeyay qabyo lagama waayo, kaliya waxaa dhameystiran wixii Alle sameeyay, marka waxaan leenahay haddii ay qabyo yihiin wixii aan soo sameynay waxaan diyaar u nahay in la dhameystiro” ayuu yiri Guddoomiyaha Baarlamaanka Soomaaliyeed Md. Shariif Xasan oo sheegay in Dowlad caloosheeda ay weyn tahay, wax kastana ay qaban karto haddii ay shaqeyso, isagoo xusay in aaney jirin cid wax qaban karta haddii qofba meel istaagto.

Md. Shariif Xasan waxaa uu u mahadceliyay dadkii soo dhaweeyay oo uu kula hadlayay shucuur aad u sareysay, isagoo u ballanqaaday in marka ay dib u laabtaan ay mas’uuliyiinta dowladda ee Kenya ku sugan gaarsiin doonaan sida ay dadka diyaarka ugu yihiin in ay dowladda soo dhaweeyaan.

Intaas kadib Guddoomiyaha Baarlamaanka waxaa uu booqday Xaruntii Radio Muqdisho oo markii uu gudaheeda galay uu la yaabay sida loo xafiday, wuxuuna cagta mariyay dhamaan Studio-yada kala gedisan ee Idaacadda iyo weliba qolalka Keydka, iyadoo intii uu ku guda jirayna loo dhegeysiinayay heeso wadaniyadda lagu cabirayay.

Kadib waxaa uu booqasho ku tegay Xarunta dhexe ee Taliska Booliska Soomaaliyeed, halkaasoo ay warbixin ku siiyeen saraakiil ka tirsan ciidamada booliska, iyadoo kadibna loo jiheeyay dhinaca dekedda weyn ee Muqdisho, halkaasoo uu ku soo dhaweeyay Xildhibaan Maxamed Jaamac Furux oo isagu Dekedda gacanta ku soo hayay tan iyo markii ay maamulkeeda ku dagaalameen xoogag isku garbinayay in ay talada dalka qabsadaan.

Md. Furux waxaa uu u sheegay Guddoomiyaha Baarlamaanka in Dekeddu ay diyaar u tahay dowladda, howlgalna ay bilaabi karto xilli kasta oo loo baahdo, iyadoo arrintaas uu aad ugu madax ruxay guddoomiyaha baarlamaanka caddeeyayna in uu warbixintaas gaarsiin doono mas’uuliyiinta kale ee dowladda.

Wafdiga Guddoomiyaha Baarlamaanka oo Khamiista dib ugu laaban doona magaalada Nairobi ayaa waxay xalay kulamo la yeesheen Madaxweynihii hore ee TNG-da Md. C/qaasim Salaad Xasan oo isagu la sheegay in uu talo wax ku ool ah u dhiibay Guddoomiyaha Baarlamaanka, iyadoo maantana ay Hotelka Ramadaan qado kula yeesheen siyaasiyiin ay ka mid ahaayeen Cali Mahdi Maxamed, Dr. Xuseen Bood iyo kuwo kale.

Salaad Iidow Xasan (Xiis) Hiiraan Online
[email protected]
Mogadishu, Somalia

Haweenka Baarlamaanka ee Muqdisho soo gaaray iyo haween horay dalka u joogay oo talooyin is-weydaarsaday

Talaado, February 08, 2005 (HOL) @ 19:00GMT: Haweenka ku jira Baarlamaanka Federaalka ah ee Soomaaliya ee la socday wafdiga Guddoomiyaha Baarlamaanka iyo Haween kale oo horay ugu sugnaa Gudaha Dalka Soomaaliya ayaa maanta waxay kulan ku yeesheen Xarunta IIDA ee magaalada Muqdisho.

Haweenkan ku sugnaa gudaha dalka ayaa waxay ka kala socdeen Ururka Ganacsatada Webi Shabeelle iyo Hay’adaha COSV iyo IIDA, waxayna soo bandhigeen in xuquuqda Haweenka Soomaaliyeed lagu tuntay markii wax lagu qeybsanayay shirkii dib u heshiisiinta Kenya, waxayse hadana muujiyeen in ay wax uun ka heleen oo ay baarlamaanka iyo Xukuumadda ay maanta ku jiraan haween Soomaaliyeed.

Caasho Shaacuur oo madax u ah Ururka Ganacsatada Webi Shabeelle, isla markaana xubin ka ah Ururka Haweenka Horseedka Nabadda iyo Nolosha ayaa sheegtay in ururkooda ganacsiga ay ku mideysan yihiin haween ganacsato ah oo gaaraya 700 oo qofood, kuwaasoo dhaqaale ay iska uruuriyeen ku furtay Warshad yar oo sameysa Dharka.

Sidoo kale waxaa iyana halkaasi ka hadlay haweenkii ka socday Baarlamaanka Federaalka Soomaaliyeed, waxayna Xildhibaanad Qamar Aadan Cali sheegtay in ay wax lagu farxo tahay in ay dalka ku sugan yihiin haween waxqabad leh oo qurux badan, iyadoo haweenkii hore ee hadlay ku raacday in sedkoodii la bursaday, inkastoo ay hadana ka dhawaajisay in ay wax uun ka heleen xubnaha dowladda oo maanta ay haweenka Soomaaliyeed leeyihiin Wasaarad Arrimahooda qaabilsan, taasoo bey tiri aaney lahayn dalal leh dowlado dhisan oo shaqeynaya.

Xildhibaanad Caasho Axmed Cabdalla ayaa iyaduna bogaadisay dadaalka ay hayaan haweenka ku sugnaa gudaha dalka, waxayna ku talo bixisay in ay lama huraan tahay in bannaanka la soo dhigo awoodda Haweenka Soomaaliyeed, sidoo kale waxaa iyana kulankaas ka hadlay Xildhibaanada kala ah Seynab Maxamed Caamir iyo Caasho Cabdi Shiikh, waxaana xusid mudan in Haweenka Xildhibaanada ah kulankaas gunaanadkiisii lagu guddoonsiiyay hadiyado dhar ah oo ay sameysay Warshadda ay leeyihiin Haweenka Ganacsatada ah.

Salaad Iidow Xasan (Xiis) Hiiraan Online
[email protected]
Mogadishu, Somalia

Maxay Mas’uuliyiin ka tirsan Jabhaddii RRA-da ka yiraahdeen imaanshaha Dowladda ee Magaalada Baydhabo?

Talaado, February 08, 2005 (HOL) @ 19:00GMT: Mas’uuliyiinta garabyada RRA-da ayaa warar kala duwan ka soo saaray imaanshaha Dowladda ee magaalada Baydhabo oo la hadal hayo in dowladdu xarun ka sii dhiganeyso magaalada Baydhabo, inta laga hagaajinayo Xarumihii Dowladda iyo ammaanka magaalada Muqdisho.

Aadan Maxamed Nuur Saransoor ayaa dowladda Federaalka KMG ah uga digay in ay soo caga dhigato magaalada Baydhabo iyo dhamaan deegaanada RRA-da uu madaxda u yahay ay gacanta ku heyso.

“Nin naftiisa nacay ayaa Baydhabo imaanayo kaasoo sheeganaya maamul aaney dadka RRA-du aqoonsaneyn”ayuu yiri Aadan Saransoor oo isku magacaabay Guddoomiyaha RRA-da. Dhanka kalena Guddoomiyaha Gobolka Bay Md. Maxamed Cali Aadan Qalinle ayaa sheegay in ay dowladda imaaneyso magaalada Baydhabo oo ay ku soo dhaweynayaan balse wuxuu diidmo ka muujiyay in Ciidamo Shisheeye la keeno dalka Soomaaliya.

“Dowladda KMG ah waan taageersannahay, diyaar ayaana u nahay in aan ku soo dhaweyno magaalada Baydhabo, waxaanse diidannahay in dalkeena Ciidamo Shisheeye la keeno”ayuu yiri Maxamed Cali Aadan Qalinle oo ka tirsan Mas’uuliyiinta RRA-da.

Qalinle waxaa uu sheegay in diidmada Aadan Saransoor ay tahay mid isaga ku kooban oo aysan la qabin RRA, “shacbiga Digil iyo Mirifle taageeradooda ku aadan Dowladda cusub ee Soomaaliya iyo diidmada shakhsiga ah ee Aadan Saransoor shacbiga Soomaaliyeed ayaan ka codsaneynaa in ay kala garsooraan” ayuuna Qalinke ku soo koobay hadalkiisa.

Salaad Iidow Xasan (Xiis) Hiiraan Online
[email protected]
Mogadishu, Somalia

Waxgarad nabadeyn ay Muqdisho gaareen ku baahinaya deegaano horay colaad ugu dhexmartay

Talaado, February 08, 2005 (HOL) @ 19:00GMT: Waxgarad ka kala socda beelaha Cali Gaaf iyo Maxamed Cadde oo ka tirsan Beesha Waceysle ee Abgaal ayaa u amba baxaya deegaanada Galcad iyo Mesagwaay ee Gobolka Galgaduud, si ay halkaas ugu baahiyaan nabadeyn ay Muqdisho ku gaareen dhowaan.

Nabaddoon Yuusuf Aw-Nuur oo ka tirsan waxgaradkaas ayaa sheegay in xubno ka tirsan labadaas beelood ay u amba baxayaan deegaanada Galcad iyo Mesagawaay, si ay halkaas ugu baahiyaan uguna sheegaan dadka deegaanadaas ku dhaqan nabadda lagu gaaray magaalada Muqdisho.

Nabaddoonku wuxuu sheegay in ay gaareen go’aano, ayna gaarsiinayaan dadweynaha baadiyaha ku nool, isagoo intaas ku daray in labadaas beelood ay wada deganaayeen afar Qarni, isla markaana aysan jirin Colaad dhexmartay marka laga reebo labo shakhsi oo ku dagaalantay Ceel, sidaas darteed Colaadihii sanadahaan dhacay ayuu sheegay in ay ahaayeen kuwo u dhacay si kedis ah, lagana wada xaajooday sidii aysan mar kale u dhici lahayn.

Nabaddoon Yuusuf Aw-Nuur waxaa uu intaas ku daray in laga heshiiyay lagana ballamay wixii meg iyo dhaqan u ahaan jiray beelahaas, wuxuuna ugu baaqay dadka deegaankaas in ay dhamaatay Colaaddii, lagana heshiiyay wixii xumaan ahaa ee horay u kala dhexmaray.

Salaad Iidow Xasan (Xiis) Hiiraan Online
[email protected]
Mogadishu, Somalia